(Khmer) ប្រជាពលរដ្ឋ ៩៦គ្រួសារមកពីភូមិសំរោងត្បួង ខណ្ឌព្រែកព្នៅ(ជាប់បឹងតាមោក) ស្នើសុំឱ្យអាជ្ញាធរជួយដោះស្រាយបញ្ហាដីធ្លីរបស់ពួកគាត់

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

នៅរសៀល ថ្ងៃទី២២ ខែមិថុនា ឆ្នាំ២០២០ ប្រជាពលរដ្ឋ ៩៦គ្រួសារដែលមានជម្លោះដីធ្លីស្ថិតនៅក្នុងភូមិសំរោងត្បួង ខណ្ឌព្រែកព្នៅ រាជធានីភ្នំពេញ(ជាប់បឹងតាមោក) បានស្នើសុំឱ្យអាជ្ញាធរជួយដោះស្រាយរឿងបញ្ហាដីធ្លីរបស់ពួកគាត់។
ការទាមទារនេះ គឺបន្ទាប់ពីមានការចុះទៅរុះរើ និងហាមឃាត់ប្រជាពលរដ្ឋមិនឱ្យសាងសង់សំណង់ថ្មី ដោយអាជ្ញាធរបានលើកឡើងនូវហេតុផលចំនួន៣ ចំនុច៖
ទី១ ប្រជាពលរដ្ឋកំពុងរស់នៅលើដីចំណីផ្លូវ
ទី២ ប្រជាពលរដ្ឋកំពុងរស់នៅលើដីបឹង
និងទី៣ ប្រជាពលរដ្ឋកំពុងរស់នៅលើដីឯកជនរបស់អ្នកដទៃ។
តែទោះបីយ៉ាងណាប្រជាពលរដ្ឋបានអះអាងថាពួកគាត់រស់នៅទីនេះតាំងតែពីឆ្នាំ១៩៩០ មកម្លេះ តាំងតែកន្លែងនេះជាដីស្រែ។ ពួកគាត់បានអះអាងបន្តទៀតថាដីទាំងនេះគឺគាត់បានទិញពីគេ និងមិនដែលឃើញមានបុគ្គលឯកជនណាផ្សេងមកអះអាងដូចអាជ្ញាធរលើកឡើងនោះទេ។ រីឯការកំណត់ផ្ទៃបឹងវិញគឺទើបតែធ្វើឡើងក្នុងឆ្នាំ២០១៦ ចំណែកការកំណត់ដីចំណីផ្លូវគឺមិនមានភាពច្បាស់លាស់មិនដឹងធ្វើឡើងពីពេលណាឱ្យប្រាកដនោះទេ។ ដូច្នេះ វាហាក់បីដូចជាមិនសមទំនងក្នុងការចោទប្រកាន់ប្រជាពលរដ្ឋនោះទេ។

បន្ទាប់ពីមានការជជែកនៅខាងក្រៅសាលាខណ្ឌរួចមក តំណាងមន្ត្រីសាលាខណ្ឌព្រែកព្នៅ បានស្នើឱ្យប្រជាសហគមន៍ ត្រឡប់ទៅផ្ទះវិញ ដោយសន្យាថា ១៥ថ្ងៃក្រោយខាងសាលាខណ្ឌនឹងស្វែករកដំណោះស្រាយជូនប្រជាពលរដ្ឋ។