ប្រជាសហគមន៍ផ្លូវរថភ្លើងព្រួយបារម្ភពីគម្រោងអភវិឌ្ឍន៍

នៅព្រឹកថ្ងៃទី៤ ខែមិថុនានេះ ប្រជាពលរដ្ឋរស់នៅសហគមន៍ផ្លូវរថភ្លើងប្រមាណ៦០នាក់បានមកជួបជុំគ្នានៅមុខសាលារាជធានីភ្នំពេញដើម្បីតាមដានដំណើរការនៃការផ្ដល់សំណងដល់ពួកគេពីគម្រោងអភិវឌ្ឍន៍ផ្លូវបេតុង។

ពលរដ្ឋទាំងនោះអោយដឹងថាការមកជួបជុំគ្នាជាថ្មីនេះដោយសារសាលារាជធានីភ្នំពេញមិនទាន់បានផ្ដល់ចម្លើយជាក់លាក់ណាមួយពីគម្រោងអភិវឌ្ឍន៍ដល់ពួកគេនៅឡើយទេ។ ពលរដ្ឋទាំងនោះបន្តថា​ ពួកគេបានមកដាក់ញត្តិជាច្រើនលើក ហើយអាជ្ញាធរចេះតែសន្យារថានឹងដោះស្រាយ​អោយពួកគេ តែមកទល់ពេលនេះសាលារាជធានីភ្នំពេញមិនទាន់បញ្ជាក់ជំហរជាក់លាក់ក្នុងការដោះស្រាយទៅឡើយទេ។

ពួកគេលើកឡើងថា ពួកគេមានការព្រួយបារម្ភពីគម្រោងអភវិឌ្ឍន៍នេះ ព្រោះកន្លងមកពលរដ្ឋតែងតែរងការបណ្ដេញចេញពីលំនៅឋាន ក្រោមគម្រោងអភវិឌ្ឍន៍របស់សាលារាជធានីភ្នំពេញ។

ប្រជាពលរដ្ឋទាំងនោះអោយដឹងថា ពួកគេនឹងបន្តការជួបជុំរៀងរាល់សប្តាហ៍ដើម្បី​ជំរុញ​ឲ្យអាជ្ញាធរពាក់ព័ន្ធពន្លឿនការដោះស្រាយបញ្ហាជូនពួកគេ៕

Picture by Vantha

Picture by Vantha