(Khmer) លីកាដូ៖ សេរីភាពក្នុងការបញ្ចេញមតិរិះគន់នៅកម្ពុជាកំពុងធ្លាក់ចុះ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

អង្គការសម្ព័ន្ធខ្មែរជំរឿននិងការពារសិទ្ធិមនុស្ស លីកាដូ​ បានចេញផ្សាយរបាយការណ៍របស់ខ្លួនកាលពីថ្ងៃម្សិលមិញ ដោយរកឃើញថា​រដ្ឋាភិបាលកម្ពុជាកំពុងរំលោភបំពាន​ និងគំរាមកំហែង អ្នកដែលហ៊ានបញ្ចេញមតិរិះគន់ទៅលើរដ្ឋាភិបាលកាន់តែធ្ងន់ធ្ងររយៈពេលពីរឆ្នាំចុងក្រោយនេះ។

អង្គការក្រៅរដ្ឋាភិបាលដែលធ្វើការលើផ្នែកសិទ្ធិមនុស្សមួយនេះបានលើកឡើងថា «ចាប់តាំង​ពីឆ្នាំ​២០១៥​ មក​ អ្នក​តំណាង​សហគមន៍​ជាច្រើន​ មេដឹកនាំ​សហជីព​ និង​សកម្មជន​បរិស្ថាន​ បាន​ទទួលរង​នូវ​ការ​ចោទប្រកាន់​ដែល​មិនមាន​មូលដ្ឋាន​ច្បាប់​ ការ​កោះហៅ​ឲ្យ​បំភ្លឺ​នៅ​ចំពោះ​មុខ​តុលាការ​ដែល​ជា​វិធីសាស្ត្រ​បំភិត​បំភ័យ​ដើម្បី​បំបិទ​មាត់​និង​បញ្ឈប់​ភាព​សកម្មនិយម​ និង​ការ​ជាប់​ពន្ធនាគារ​ តាម​រយៈការ​ប្រើប្រាស់​ប្រព័ន្ធ​តុលាការ​កម្ពុជា​ដែល​មាន​លក្ខណៈ​លំអៀង​ ចំពោះ​បុគ្គល​ដែល​អាជ្ញាធរ​យល់​ថាជា​ការ​គំរាម​កំហែង​ដល់ខ្លួន»

អ្នក​នាំពាក្យ​ក្រសួងយុត្តិ​ធម៌​​លោក ជិន ម៉ាលីន បានផ្ដល់បទសម្ភាសន៍ដល់ព័ត៌មានក្នុងស្រុកមួយថា« រដ្ឋាភិបាល​ធ្វើការ​អនុវត្តន៍​ច្បាប់​ស្មើគ្នា​ៗ ហើយថា​ការ​រក​ឃើញ​របស់​លីកាដូ​នេះ​ជា​ការ​រក​ឃើញ​តែ​មួយ​ជ្រុងប៉ុណ្ណោះ​ដែលមិន​បាន​សិក្សា​ស្ថានភាព​​បច្ចេក​ទេស​ផ្លូវ​​ច្បាប់។ លោក​លើក​ឡើង​ថា​ប្រទេស​នីតិរដ្ឋ​ការ​ប្រើ​ប្រាស់​ប្រព័ន្ធ​តុលាការ​គឺ​ជាមធ្យោបាយ​តែ​មួយ​គត់​ក្នុង​ការ​អនុវត្តន៍​ច្បាប់»។

លីកាដូបន្តថា​៖ ​«វិធីសាស្ត្រ​ដ៏​យូរ​អង្វែង​ជាច្រើន​ ដែល​នៅតែ​ត្រូវ​បាន​ប្រើប្រាស់​ដើម្បី​បំបិទ​សំឡេង​អ្នក​ការពារ​សិទិ្ធ​មនុស្ស​ (ដូចជា​៖ ការ​ប្រើប្រាស់​ប្រព័ន្ធ​តុលាការ​ដែល​មាន​លក្ខណៈ​លំអៀង​ ការ​ប្រើ​ប្រាស់​អំពើ​ហិង្សា​ដែល​គាំទ្រ​ដោយ​អាជ្ញាធរ​ និង​ការ​បង្ក្រាប​លើ​ការ​តវ៉ា​ដោយ​អហិង្សា​នានា)​ ត្រូវ​បាន​បន្ថែម​ទម្ងន់​តាមរយៈ​ការ​អនុម័ត​ច្បាប់​ថ្មី​មួយ​ចំនួន​ដែល​មាន​លក្ខណៈ​គាប​សង្កត់​ ហើយ​និង​ការ​ត្រួត​ពិនិត្យ​ចាប់​ពិរុទ្ធ​តាមរយៈ​ប្រព័ន្ធ​អ៊ិន​ធើណេត»។​

លិកាដូលើកឡើងថាការ​បំភិត​បំភ័យ​ដើម្បី​បំបិទ​មាត់​អ្នកដែលហ៊ានតវ៉ា ឬអ្នកមិនគាំទ្ររាជរដ្ឋាភិបាល អាច​នឹងបន្ត​ទៀតទៅ​ថ្ងៃ​អនាគត​ ហើយ​នឹង​បន្ត​ក្លាយ​ជា​ផ្នែក​មួយ​នៃ​កិច្ច​ប្រឹងប្រែងរបស់​អ្នក​សិទ្ធិ​មនុស្ស​ ដើម្បី​ការ​ពារ​សេរី​ភាព​ប្រជា​ពល​រដ្ឋ​ដែល​ធានា​ដោយ​រដ្ឋធម្មនុញ្ញ​​កម្ពុជា៕