Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.
តុលាការសាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញ លើសំណុំរឿងមន្ត្រីការពារសិទ្ធិមនុស្សអាដហុក៤រូប ក្រោយជំនុំជម្រះនាព្រឹកថ្ងៃទី ២៤ ខែឧសភា ឆ្នាំ២០១៧ នេះ។ការបើកសវនាការនេះ ធ្វើឡើងក្រោយមេធាវីការពារក្តីឲ្យមន្ត្រីអាដហុកទាំងនោះប្ដឹងជំទាស់នឹងការសម្រេចបន្តឃុំខ្លួនកូនក្ដីរយៈពេល៦ខែបន្ថែមទៀត។ ដោយឡែកលោក នី ចរិយា មន្ត្រី គ.ជ.ប មិនបានប្ដឹងជំទាស់ក្នុងនីតិវិធីនេះទេ។
កាលពីចុងខែមេសាកន្លងទៅនេះ ចៅក្រមស៊ើបសួរសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ បានសម្រេចបន្តឃុំខ្លួនមន្ត្រីអាដហុកទាំង៤រូបរយៈពេល ៦ ខែបន្ថែមទៀត ដើម្បីសាកសួរទៅលើសាក្សី និងអ្នកជាប់ពាក់ព័ន្ធផ្សេងទៀត។
មន្ត្រីអាដហុកទាំង៤រូប រួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី បានជាប់ឃុំជាងមួយឆ្នាំមកហើយ ពីបទ «សូកប៉ាន់សាក្សី» ក្នុងរឿងអាស្រូវរបស់ស្រីមុំ និងលោក កឹម សុខា ប្រធានគណបក្សសង្គ្រោះជាតិ។
មន្ត្រីប៉ូលិសបានរឹតបន្តឹងសន្តិសុខដោយមិនអនុញ្ញាតឲ្យអ្នកសារព័ត៌មានជាតិ និងអន្តរជាតិចូលក្នុងបរិវេណសាលាឧទ្ធរណ៍ទេ។ ចំពោះអង្គការសង្គមស៊ីវិល អនុញ្ញាតឲ្យចូលតែស្ថិតនៅក្រោមការត្រួតពិនិត្យរបស់មន្ត្រីប៉ូលិស និងមិនអនុញ្ញាតឲ្យថតរូបឬ វីដេអូឡើយ៕
