(Khmer) ពលរដ្ឋ​ខេត្ត​ស្វាយ​រៀង​ ​លើកគ្នា​ទៅ​​ទប់​ស្កាត់​​គ្រឿង​​ចក្រ​ក្រុម​ហ៊ុន​ឈូស​ឆាយ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រជា​ពល​រដ្ឋ​ជិត​១៥០នាក់ តំណាង​ឲ្យ​ ៤៤០​គ្រួសារ នៅ​ឃុំ​អំពិល​ ស្រុក​រមាស​ហែក ខេត្ត​ស្វាយ​រៀង​ កាលពី​ថ្ងៃ​ម្សិលមិញ ​​បាន​លើកគ្នា​ទៅ​​ទប់​ស្កាត់​​គ្រឿង​ចក្រ​របស់​​ក្រុម​ហ៊ុន​អុិន​ខេ​ វេន​ឆ័រ ដែល​ពួក​គាត់​​​អះអាងថា បាន​ទៅ​ឈូស​ឆាយរំលោភ​​ដី​របស់​ពួក​គាត់​​។

តំណាង​ប្រជាពលរដ្ឋ អ្នកស្រី ម៉ន ស៊ីណា ដែល​ដីរបស់​គាត់រងប៉ះពាល់​​ដោយសារ​ការ​ឈូស​ឆាយ​នោះ បាន​ឲ្យ​ដឹង​ថា ដើម​ហេតុ​ដែលពួកគាត់​នាំគ្នា​ទៅ​ទប់​ស្កាត់​គ្រឿង​ចក្រនេះ ដោយសារតែ​ក្រុម​ហ៊ុន​អ៊ីន​ខេវិនឆ័រ​​ របស់​ឥណ្ឌា បាន​យក​គ្រឿង​ចក្រ​​​ទៅ​ឈូស​ឆាយ​​ដី​​បង្ក​បង្កើន​ផល​​​របស់​ប្រជាពលរដ្ឋ ទៅ​ដាំ​ដំណាំកសិឧស្សាហកម្ម​​ ខណៈដែល​ដី​នេះ​ប្រជា​ពលរដ្ឋ​បាន​កាន់​កាប់​​តាំង​ពី​ឆ្នាំ​១៩៧៩។

អ្នកស្រី បាន​លើកឡើងថា៖ «ក្រុម​ហ៊ុន​ហ្នឹង​ទៅ​​រឹប​អូស​​យក​ដី​របស់​​ប្រជា​ពលរដ្ឋ យក​ទៅ​ឈូស​ឆាយ​​មិន​ដឹង​អ្វី​ទេ តែ​ពី​មុន​គេ​ប្រុង​ដាំ​អំពៅ តែ​ប្រជា​ពលរដ្ឋ​តវ៉ាអត់​ឲ្យ​ដាំ​ទេ ព្រឹក​មិញ​[ថ្ងៃ​​ពុធ]គេយក​គ្រឿង​ចក្រ​២​គ្រឿង​មក​ព្យួរ​ទៀត តែ​យើងថា​កុំអាល​ព្យួរ ប្រជាពលរដ្ឋ​កំពុង​រក​ផ្លូវ​ច្បាប់​ដោះ​ស្រាយ​​ហើយ​ ចាំ​​និយាយ​គ្នា​ទៀត»។

បើតាម​ប្រជាពលរដ្ឋ បញ្ហា​ទំនាស់​ដីធ្លី​រវាងប្រជា​ពលរដ្ឋ ៤៤០​គ្រួសារ ក្នុ​ង​ភូមិចំនួន​៦ នៃ​ឃុំ​​អំពិល ស្រុក​រមាស​ហែក ជាមួយ​ក្រុម​ហ៊ុន​អុិន​ខេ​វេន​ឆ័រ​នេះ បាន​កើ​តឡើង​តាំង​ពី​ឆ្នាំ​២០១២​មក ដែល​​មានទំហំដី​ ៦៧០​ហិក​តា។​ ពួកគាត់​បាន​អះអាង​ថានឹង​បន្ត​ការ​តវ៉ា មិន​ឲ្យ​មានការ​ឈូស​ឆាយ​លើ​ដី​ទំនាស់​ទេ រហូត​ដល់​មាន​ដំ​ណោះ​ស្រាយ​សម​រម្យ​សម្រាប់​ពួកគាត់។

ភាគី​ក្រុម​ហ៊ុន​អុិន​ខេ វិនឆ័រ ពុំអាច​​ស្វែង​រកសុំ​ការអត្ថា​ធិប្បាយ​បាន​ទេ កាល​ពីថ្ងៃ​ម្សិល​មិញ។

ចំណែក មន្ត្រី​ខុទ្ទ​កាល័យ​សាលា​ខេត្ត​ស្វាយ​រៀង លោក ចិន សាធាន បាន​ប្រាប់​ថា លោក​ពុំ​ទាន់​បាន​ទទួលព័ត៌​មាន​ពី​ការ​តវ៉ា​នេះទេ ប៉ុន្តែ​លោក​នឹង​​​ស្នើ​ឲ្យ​អាជ្ញាធរ​ស្រាវ​ជ្រាវ​លើ​ករណី​នេះ​។

លោក​ថា៖ «ខ្ញុំ​អត់បាន​ទទួល​ព័ត៌មាន​ហ្នឹង​ផង ចាំ​ខ្ញុំ​ស៊ើប​សួរ​បឋម​សិន ចាំ​ខ្ញុំ​​បាន​ព័ត៌មាន​តាម​ក្រោយ​»។

លោក​ ថេង​ សាវឿន អគ្គ​លេខា​ធិការ​សម្ព័ន្ធ​កសិករកម្ពុជា បាន​មាន​ប្រសាសន៍ថា​ បញ្ហា​ទំនាស់​ដីធ្លីដែលមាន​​ទំហំ​ធំធេង​​​រវាង​ប្រជា​ពលរដ្ឋ​ ជាមួយ​ក្រុម​ហ៊ុន​អុិន​ខេ​វេន​ឆ័រ ដែល​បច្ចុប្បន្ន​ក្រុម​ហ៊ុន​​បាន​ផ្ទេរ​​ទៅ​ឲ្យ​ក្រុម​ហ៊ុន​អាន​ម៉ារ៉ាឌី​​​​ ធ្វើការ​វិនិយោក​បន្ត​នេះ បាន​កើ​តឡើង​រ៉ាំ​រៃជា​ច្រើន​ឆ្នាំ​មក​ហើយ នៅ​តែ​ពុំ​ទាន់​​មាន​ដំណោះស្រាយ​នៅ​ឡើយ។

ករណី​នេះ លោក​បាន​ជំរុញ​ឲ្យ​អាជ្ញាធរ​​ពាក់​ព័ន្ធ ដោះស្រាយ​បញ្ចប់​ជម្លោះ​ជូន​ប្រជា​ពលរដ្ឋ ខណៈ​ដែល​ពួក​គាត់​ត្រូវ​ការ​ដី​ធ្លី​សម្រាប់​បង្ក​​បង្កើន​ផល​​​ទ្រទ្រង់ជីវភាព​រស់នៅ។

លោកបាន​ថ្លែង​​​ថា៖ «​បើ​សិន​ជា​ពលរដ្ឋ​អត់​ដី ក្រុមហ៊ុន​រឹប​អូស​ដី​ក៏​ដូច​ជា​ឈូស​ឆាយ​ដី​គាត់ នោះ​ស្មើ​នឹង​ការ​សម្លាប់​ប្រជា​ពលរដ្ឋ​ដោយ​​ប្រយោល ដែលមានន័យ​ថា​ពលរដ្ឋ​អត់​ដី គឺ​គ្មាន​ជីវិត​ទេ ដូច្នេះ​ស្នើ​ឲ្យ​រដ្ឋាភិបាល​ចាត់​វិធាន​ការ​ដោះស្រាយ​បញ្ហា​ដីធ្លីនេះដោយ​សន្តិ​វិធី និងឈរ​លើ​គោល​ការណ៍​ភាព​យុត្តិ​ធម៌ មិន​មែន​លម្អៀងទៅ​រក​ភាគី​ណា​មួយ​​ឡើយ គឺ​​ត្រូវ​ចុះ​សិក្សា​ឲ្យ​បាន​ច្បាស់​​លាស់​​ពីវិវាទ​ដីធ្លី​នេះ»៕

ប្រភព៖ khmertimeskh.com