កងសន្តិសុខរារាំងការដាក់ញត្តិសុំអន្តរាគមន៍ដោះលែងអ្នកស្រីទេព វន្នីរបស់សហគមន៍បឹងកក់

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

នៅព្រឹកថ្ងៃទី១២​ ខែឧសភានេះ ក្រុមស្ត្រីបឹងកក់ប្រមាណ២០នាក់បានបន្តដាក់ញត្តិនៅធនាគារពិភពលោក ស្ថានទូតអាមេរិច និងបារាំង ដើម្បីស្នើសុំឲ្យស្ថាប័នទាំងនោះជួយរកយុត្តិធម៌ និងអន្តរាគមន៍ដល់រដ្ឋាភិបាលឲ្យមានការដោះលែងអ្នកស្រី ទេព វន្នី។

ការដាក់ញត្តិរបស់ពួកគេនៅធនាគារពិភពលោកមិនបានសំរេចទេ ដោយមានការរារាំងពីកងសន្តិសុខខណ្ឌដូនពេញប្រមាណជា៥០នាក់។ កងសន្តិសុខឲ្យប្រជាសហគមន៍ត្រឡប់ទៅផ្ទះវិញ ដោយលើកហេតុផលថាធ្វើឲ្យប៉ះពាល់សណ្ដាប់ធ្នាប់សាធារណៈ និងខូចមុខមាត់ប្រទេស ខណៈដែលប្រទេសកម្ពុជាកំពុងធ្វើជាម្ចាស់ផ្ទះវេទិកា​សេដ្ឋកិច្ច​ពិភពលោក (World Economic forum on Asean)។

ក្រុមស្ត្រីទាំងនោះបានបន្តទៅដាក់ញត្តិនៅស្ថានទូតអាមេរិច និងបារាំង ក្រោមការឃ្លាំមើលពីសំណាក់សន្តិសុខ។ តំណាងស្ថានទូតទាំងពីរបានចេញមកទទួលញត្តិរបស់ពួកគេ។

ក្រុមស្ត្រីទាំងនោះលើកឡើងថា នេះជាការបំបិទសិទ្ធសេរីភាពនៃការជួបជុំរបស់ពួកគេ។

អ្នកស្រី ប៉ូវ សោភា លើកឡើងថា៖ «ពួកខ្ញុំមិនមែនជាអ្នកធ្វើអោយខូចមុខមាត់ទៅថ្នាក់ដឹកនាំទេ ខ្ញុំសុំឲ្យមានការអន្តរាគមន៍ដោះលែងអ្នកស្រី ទេព វន្នីតែប៉ុណ្នឹងទេ។ ញត្តិរបស់ពួកខ្ញុំមិនបានដាក់ទៅដើម្បីធ្វើបាបទៅថ្នាក់ដឹកនាំ ឬមួយក៏ប្រមាថទៅដល់ថ្នាក់ដឹកនាំទេ តែថ្នាក់ដឹកនាំទេដែលធ្វើអោយខ្លួនឯងធ្លាក់ទាបទៅតាមអ្វីដែលខ្លួនកំពុងតែធ្វើសព្វថ្ងៃហ្នឹង ហើយសូម្បីសណ្ដាប់ធ្នាប់ហាឡើងចាប់ដាក់គុក ចាប់ដាក់ស្នងការ​ ខ្ញុំមិនដឹងថាឥឡូវនឹងគេប្រើច្បាប់អី»។

អ្នកស្រីទេព វន្នីត្រូវបានអាជ្ញាធរចាប់ខ្លួនកាលពីថ្ងៃទី ១៥ ខែសីហា ឆ្នាំ២០១៦ ក្នុងយុទ្ធនាការណ៍ថ្ងៃច័ន្ទពណ៍ខ្មៅ។ អ្នកស្រីកំពុងជាប់ពន្ធធនាគារ ក្រោមបណ្ដឹងរបស់អាជ្ញាធរ ដែលប្ដឹងអ្នកស្រីដឹកនាំឲ្យមានអំពើហឹង្សា ក្នុងពេលតវ៉ានៅមុខផ្ទះលោកនាយករដ្ឋមន្រ្តី ហ៊ុន សែន កាលពីថ្ងៃទី១៣ ខែមីនា ឆ្នាំ២០១៣។

គួររំលឹកថា កាលពីថ្ងៃទី៩ ខែឧសភា ពួកគេក៏ធ្លាប់បានមកដាក់ញត្តិសុំអន្តរាគមន៍ឲ្យមានការដោះលែងអ្នកស្រីទេព វន្នី នៅ​​ការិយាល័យ​ឧត្ដម​ស្នងការ​អង្គការ​សហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅកម្ពុជា ស្ថានទូត​ជប៉ុន និងសហភាពអឺរ៉ុបប្រចាំកម្ពុជាម្តងរួចមកហើយ៕