(Khmer) ប្រជាសហគមន៍បុរីកីឡា ប្រារព្ធខួប៧ឆ្នាំនៃការបណ្តេញចេញដោយបង្ខំ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

នៅព្រឹកថ្ងៃទី០៣​ ខែមករា​ ឆ្នាំ២០១៩​ សហគមន៍បុរីកីឡាបានប្រារព្ធខួប៧ឆ្នាំនៃ​ការបណ្តេញចេញដោយបង្ខំពីសំណាក់ក្រុមហ៊ុន​អភិវឌ្ឍន៍​ និងអាជ្ញាធររាជធានីភ្នំពេញ។ ប្រជាពលរដ្ឋដែលមកពីសហគមន៍ផ្សេងៗ​ និង​ក្រុមសង្គម​ស៊ីវិល ​ប្រមាណ​ ៥០ នាក់​ បាន​ប្រមូល​ផ្តុំគ្នា​នៅក្នុង​សហគមន៍​បុរីកីឡា​ ដើម្បី​ប្រារព្ធ​ពិធីសាសនា​ និងថ្លែង​ទៅកាន់​អ្នកសារព័ត៌មាន​ អំពី​ការ​បណ្តេញ​ចេញ​ដោយ​បង្ខំ​ និង​សិទិ្ធ​ដីធ្លីរបស់​អ្នក​ទាំងនោះ។​ តំណាងសហគមន៍បុរីកីឡា អ្នកស្រី ស​ ស៊ន បាននិយាយថា​ សមាជិករបស់អ្នកស្រីដែលនៅសេសសល់ចំនួន ៧គ្រួសារទៀត​ មិនព្រមទទួលនូវសំណងរបស់ក្រុមហ៊ុន​ ដោយអ្នកស្រីបានសង្កត់ធ្ងន់ថា​ សំណងដែលក្រុមហ៊ុនផ្តល់ឱ្យកន្លងមកនោះ​គឺមិនសមរម្យ​ ដែលមិនអាចឱ្យក្រុមគ្រួសារទាំងនោះអាចយកទៅទិញផ្ទះនៅកន្លែងផ្សេងទៀតបានឡេីយ។ ដូច្នេះ អ្នកស្រី និងសមាជិកផ្សេងទៀតនៅតែបន្តទាមទារការអភិវឌ្ឍនៅនឹងកន្លែងតែម្តង។ កម្មវិធីនេះបានចាប់ផ្តើមនៅម៉ោង ៨ព្រឹក និងបានបញ្ចាប់នៅម៉ោង ១០ព្រឹក ដោយ​ស្ថិតនៅក្នុងការ​​ឃ្លាំមើលពីអាជ្ញាធរខណ្ឌ ៧មករា​​ ប្រមាណ ​ ១០នាក់​​ និង​បាន​ហាម​ឃាត់ប្រជា​សហគមន៍​​មិនឲ្យ​មាន​ការព្យួរ​ ឬកាន់​បដាអ្វី​ទាំងអស់។

អ្នកស្រី ស ស៊ន តំណាងសហគមន៍បុរីកីឡាពេលកំពុងផ្តល់បទសម្ភាសន៍ជាមួយអ្នកសារព័ត៌មាន

គួររំលឹកផងដែរថា កាលពី​ថ្ងៃទី៣​ ខែមករា​ ឆ្នាំ២០១២​ ពលរដ្ឋ​សហគមន៍​បុរីកីឡា​ ត្រូវបាន​អាជ្ញាធរ​បណ្តេញចេញ​ដោយបង្ខំ​ពីទីតាំង​សហគមន៍​របស់​អ្នកទាំងនោះ​ នៅពេល​ក្រុមហ៊ុន​ ផាន អ៊ីមិច​ ដែល​គ្រប់គ្រង​ដោយ​អ្នកស្រី​ ស៊ុយ សុផាន​ បាន​ឈូសឆាយ​ផ្ទះសំបែង​របស់​អ្នកទាំងនោះ​ ដោយ​មិនបាន​ជូនដំណឹង​ជាមុន​ និងមាន​ការជួយ​ពីកងកម្លាំង​ប្រដាប់​អាវុធ​ជាច្រើន។​

ក្រុមហ៊ុន​ ផាន អ៊ីមិច​ បានទទួល​ដីសម្បទាន​នៅទីតាំងនោះ​ ដោយ​មានកិច្ចសន្យាថា​ នឹងត្រូវ​សាងសង់​អាគារ​ចំនួន​ ១០​ នៅលើ​ទីតាំង​នោះ​ ដើម្បី​អភិវឌ្ឍ​នៅនឹង​កន្លែង​ជូន​ពលរដ្ឋ​បុរីកីឡា​ ហើយ​ដីដែល​នៅសល់​ចំនួន​ ២,៦​ ហិកតា​ នឹង​ត្រូវបាន​អភិវឌ្ឍ​ដោយ​ក្រុមហ៊ុន​។ ប៉ុន្តែ​ នៅឆ្នាំ ​២០១០​ ក្រុមហ៊ុន​ បាន​រំលោភ​កិច្ចសន្យា​ បន្ទាប់ពី​បាន​សាងសង់​អាគារទី ៨​ ដោយ​ធ្វើឲ្យពលរដ្ឋ​ចំនួន ៣០០​ គ្រួសារ​ មិនទាន់​បានទទួល​ផ្ទះសំបែង៕