(Khmer) ក្រុង​សន្យា​ដោះស្រាយ​សំណង​ជូន​អ្នក ​បុរីកីឡា​ ដែល​កំពុង​តវ៉ា

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព៖ ភ្នំពេញប៉ុស្តិ៍

ភ្នំពេញ: សាលា​រាជធានី​ភ្នំពេញ​កាលពី​ម្សិលមិញ​បាន​សម្រេច​កំណត់​យក​រយៈពេល ៨ ថ្ងៃ​ដើម្បី​ចុះ​សិក្សា​ស្វែងរក​ដំណោះ​ស្រាយ​ចំពោះ​ការ​ទាមទារ​សំណង​ដែល​អ្នក​បុរី​កីឡា​ប្រមាណ​ពី​ ៤០-៥០ ​គ្រួសារ​មិន​ទាន់​បាន​ទទួល​នៅ​ក្នុង​ជម្លោះ​ខ្វែង​គំនិត​គ្នា​នៅក្នុង​តំបន់​អភិវឌ្ឍន៍​សហគមន៍​បុរី​កីឡា​ទោះបី​យ៉ាង​ណា​ក៏ដោយ​អ្នក​ដែល​មិន​ទាន់​បាន​ទទួល​ដំណោះស្រាយ​នូវ​​សំណង​នេះ​មិន​ទាន់​ទុក​ចិត្ត​ទៅ​លើ​ការ​សន្យា​នោះ​ទេ។

កាលពី​ព្រឹក​ម្សិលមិញ​​អ្នក​បុរី​កីឡា​ប្រមាណ​ជា​ ៣០ ​នាក់​បាន​ធ្វើ​ពិធី​បួងសួង​នៅ​ខាង​មុខ​អគារ​បុរី​កីឡា​ដើម្បី​ឲ្យ​វត្ថុ​ស័ក្ដិសិទ្ធិ​ដែល​ជា​អំណាច​នៃ​ដួង​ព្រលឹង​ជួយ​ជំរុញ​​ឲ្យ​អាជ្ញាធរ​ពាក់ព័ន្ធ​ជួយ​ដោះស្រាយ​បញ្ហា​របស់​ពួកគេ។ ទន្ទឹម​គ្នា​នោះ​ពួកគេ​​ក៏​បាន​ដាក់​បណ្តា​សា​ដល់​​អាជ្ញាធរ​ផង​ដែរ​ឲ្យ​ជួប​តែ​សេចក្តី​ទុក្ខ​លំបាក​បើ​សិន​ជា​មិន​ជួយ​ពន្លឿន​ការ​ដោះស្រាយ​បញ្ហា​ផ្ទះ​សំបែង​របស់​ពួកគេ​។ នៅ​ម៉ោង​ប្រហែល​ ៩ ​ព្រឹក​ពួកគេ​បាន​ធ្វើ​ដំណើរ​តាម​​រ៉ឺម៉ក​កង់បី​ទៅ​កាន់​សាលា​រាជធានី​ភ្នំពេញ​ក្រោម​ការ​ឃ្លាំ​មើល​ពី​សមត្ថកិច្ច​ប្រហែល​ជា​ ២០ ​នាក់​។

អ្នកស្រី​ សុក ស្រីអូន តំណាង​អ្នក​បុរី​កីឡា​ ៣២ ​គ្រួសារ​ដែល​​មិន​ទាន់​បាន​ទទួល​សំណង​ពី​ការ​បណ្តេញ​ចេញ​តាំងពី​ឆ្នាំ​ ២០១២ ​មក​នោះ​បាន​ឲ្យ​ដឹង​ក្រោយ​ពី​ជួប​ជាមួយ​ភាគី​សាលា​រាជធានី​ភ្នំពេញ​នា​ព្រឹក​ម្សិលមិញ​ថា​សាលា​រាជធានី​សន្យា​ថា​កំណត់​យក​ថ្ងៃ​ទី​ ២៦ ខែ​ធ្នូ​ឆ្នាំ​ ២០១៦ ដល់​ថ្ងៃ​ទី​ ៣ ​ខែ​មករា​ឆ្នាំ​ ២០១៧ ​សម្រាប់​ដោះស្រាយ​សំណង​នានា​ដែល​អ្នក​បុរី​កីឡា​ទាមទារ​។

អ្នកស្រី​ថ្លែង​ថា​៖ ​«​ខ្ញុំ​ទាមទារ​ផ្ទះ​អភិវឌ្ឍន៍​នៅ​នឹង​​កន្លែង​រង់ចាំ​មើល​ដល់​ថ្ងៃ​ហ្នឹង​សិន​គាត់​ថា​អាច​ខុស​ថ្ងៃ​គ្នា​បន្តិច​បន្តួច​វា​ដូចជា​សង្ឃឹម​ថា​ ៥០ ​ភាគរយ​ចុះ​ទាមទារ​ចង់​តែ​បាន​ហ្នឹង​»​។

អ្នក​បុរីកីឡា​ម្នាក់​ទៀត​អ្នកស្រី ស សន ដែល​តំណាង​​ឲ្យ​អ្នក​បុរី​កីឡា​​ ១៣ ​គ្រួសារ​ផ្សេង​ទៀត​ដែល​ត្រូវ​បាន​​អាជ្ញាធរ​ស្នើ​ឲ្យ​ទៅ​រស់នៅ​ភូមិ​អណ្តូង​ឯ​ជាយ​រាជធានី​ភ្នំពេញ​នោះ​បាន​ថ្លែង​ថា​អ្នកស្រី​មិន​ទទួល​សំណើ​នេះ​ទេ​ហើយ​ថា​ការ​ដោះស្រាយ​នោះ​​ថ្ងៃ​ខាង​មុខ​អ្នកស្រី​គឺ​ទាមទារ​ឲ្យ​បាន​ការ​អភិវឌ្ឍ​នៅ​នឹង​កន្លែង​។ អ្នកស្រី​ថ្លែង​ថា​ទៅ​រស់នៅ​ភូមិ​​អណ្តូង​មួយ​គ្រួសារ​បាន​បន្ទប់​មួយ​ទំហំ​​ ៤ ​ម៉ែត្រ​គុណ​នឹង​ ៥ ​ម៉ែត្រ​​ និង​ទឹកប្រាក់​ពី​ ២០០០ ដុល្លារ​ដល់​ ៧០០០ ​ដុល្លារ​តាម​​ស្ថានភាព​គ្រួសារ​។

អ្នកស្រី​បន្ថែម​ថា​៖ ​«​ឲ្យ​តែ​គាត់​ដោះស្រាយ​សំណង​សមរម្យ​មក​ទទួល​យក​ហើយ​​បើ​នៅ​តែ​ឲ្យ​នៅ​ភូមិ​អណ្តូង​ទេ​មិន​អាច​យក​ទេ​ពួក​យើង​មិន​អាច​ទទួល​យក​បាន​ចង់​អភិវឌ្ឍន​នឹង​កន្លែង​យើង​ប្រកាន់​ជំហរ​តាម​កិច្ចសន្យា​របស់​សម្តេច និង​ក្រុមហ៊ុន​​»​។

អ្នក​នាំពាក្យ​សាលា​រាជធានី​ភ្នំពេញ​លោក ម៉េត មាសភក្តី ឲ្យ​ដឹង​ថា​សាលា​រាជធានី​បាន​ពន្យល់​ប្រជាពលរដ្ឋ​ទាំង​នោះ​ពី​ដំណើរការ​ដោះស្រាយ​បញ្ហា​នៅ​បុរី​កីឡា​នេះ​ដោយ​​អាជ្ញាធរ​កំពុង​ដោះស្រាយ​ជា​បន្តបន្ទាប់​ដោយ​សាលា​រាជធានី​មាន​ក្រុម​ការងារ​ដើម្បី​សិក្សា និង​ដោះស្រាយ​បញ្ហា​នេះ​តែ​ត្រូវ​ការ​ពេលវេលា​មិន​អាច​លឿន​ដូច​អ្វី​ដែល​ប្រជាពលរដ្ឋ​ចង់​បាន​នោះ​ទេ​។

លោក​បន្ថែម​ថា​៖ ​«​អ្នក​នៅ​សល់​ប៉ុន្មាន​ហ្នឹង​យើង​ក៏​នៅ​បន្ត​ដោះស្រាយ​ជាមួយ​គាត់​ដែរ​ហើយ​នីតិវិធី​ដោះស្រាយ​យើង​មាន​ក្រុម​ការងារ​វាយតម្លៃ​យើង​ជូន​ដំណឹង​ឲ្យ​គាត់​ដឹង​ហើយ​រង់ចាំ​មើល​ថា​ឈ្មោះ ឬ​ក្រុម​របស់​គាត់​ណា​មួយ​ស្ថិត​ក្នុង​ការ​ដោះស្រាយ​នៅ​ពេល​ណា​»​។

យ៉ាងណា​មិញ​មាន​អតីត​អ្នក​បឹងកក់​ក៏​បាន​ទៅ​កាន់​សាលា​រាជធានី​ដែរ​តែ​មិន​បាន​ចូល​ជួប​មន្ត្រី​សាលា​រាជធានី​ទេ​ និង​មាន​ការ​រុញ​ច្រាន​គ្នា​ជាមួយ​សន្តិសុខ​ខណ្ឌ​ដូនពេញ​មួយ​ប្រាវ​ផង​ដែរ​តែ​មិន​មាន​អ្នក​រងរបួស​ទេ​។

ត្រង់​ចំណុច​នេះ​លោក ម៉េត មាសភក្តី មាន​ប្រសាសន៍​ថា​ការ​រុញ​ច្រាន​គ្នា​នេះ​មិន​មាន​ជា​ចេតនា​ហិង្សា​ណា​មួយ​នោះ​ទេ​ដោយ​​គ្រាន់​តែ​កម្លាំង​សន្តិសុខ​ព្យាយាម​រៀបចំ​សណ្តាប់ធ្នាប់​នៅ​លើ​ផ្លូវ​​​សាធារណ​តែ​ប៉ុណ្ណោះ​។

លោក​ថ្លែង​ថា​មូលហេតុ​ដែល​អតីត​អ្នក​បឹងកក់​មិន​បាន​ចូល​ជួប​មន្ត្រី​សាលា​រាជធានី​ភ្នំពេញ​ព្រោះ​​អ្នក​ទាំង​នោះ​ជា​អ្នក​ធ្លាប់​ទទួល​សំណង និង​បាន​យល់ព្រម​ចាកចេញ​រួច​ទៅ​ហើយៗ​ថ្វីដ្បិត​តែ​យ៉ាង​នេះ​ក្តី​​ក៏​មិនមែន​មាន​ន័យ​ថា​អាជ្ញាធរ​បោះបង់​ពួកគាត់​នោះ​ទេ​ដោយ​​អាជ្ញាធរ​នៅ​តែ​បន្ត​ជួយ​ពួកគាត់​តាមរយៈ​ការ​បន្ត​អភិវឌ្ឍ​នៅ​មូលដ្ឋាន​ដែល​ពួកគាត់​កំពុង​រស់នៅ​។

ទាក់ទង​នឹង​បញ្ហា​ដីធ្លី​នេះ​ដែរ​កាលពី​ម្សិលមិញ​សកម្មជន​ដីធ្លី​បឹងកក់​ម្នាក់​គឺ​អ្នកស្រី គង់ ចន្ថា ត្រូវ​បាន​ចៅក្រម​ស៊ើបសួរ​សាលា​ដំបូង​រាជធានី​ភ្នំពេញ​កោះ​ហៅ​ទៅ​សាកសួរ​ទាក់ទង​នឹង​សំណុំ​រឿង​មួយ​ដែល​ប្តឹង​ដោយ​ស្រ្តី​បឹងកក់​ម្នាក់​ទៀត​ពី​បទ​ជេរ​ប្រមាថ និង​គំរាម​សម្លាប់​កាលពី​ឆ្នាំ​ ២០១១​។

អ្នកស្រី​ គង់​ ចន្ថា​ ​ប្រាប់​ភ្នំពេញ​ប៉ុស្តិ៍​ថា​អ្នកស្រី​បាន​បញ្ជាក់​ទៅ​ចៅក្រម​ស៊ើបសួរ​ដោយ​អះអាង​ថា​អ្នកស្រី​មិន​នៅ​កន្លែង​​កើតហេតុ​ទេ​នៅ​ពេល​នោះ​តែ​ចៅក្រម​ស៊ើបសួរ​បាន​សម្រេច​ដាក់​អ្នកស្រី​ឲ្យ​ស្ថិត​នៅ​ក្រោម​ការ​ត្រួត​ពិនិត្យ​របស់​តុលាការ​ព្រោះ​​តុលាការ​តម្រូវ​ឲ្យ​អ្នកស្រី​ទៅ​បង្ហាញ​ខ្លួន​នៅ​ប៉ុស្តិ៍​រដ្ឋបាល​មួយ​ខែ​ម្តង​ពេល​ចាកចេញ​​ទៅ​ណា​​ឬ​ ​ក្រៅ​ប្រទេស​ត្រូវ​រាយការណ៍​ទៅ​តុលាការ​ហើយ​បើ​អ្នកស្រី​ផ្លាស់​ទី​លំនៅ​ក៏​ត្រូវ​ជូន​ដំណឹង​ទៅ​តុលាការ​ដែរ​។

អ្នកស្រី​បន្ថែម​ថា​៖ ​«​គេ​ឲ្យ​យើង​គោរព​តាម​លក្ខខណ្ឌ​របស់​គេ​ទាំង​បី​ហ្នឹង​តែ​ម្តង​ដែល​​​នេះ​ជា​ការ​គំរាម​កំហែង​បំបាក់​ស្មារតី​ដល់​សកម្មជន​ដីធ្លី​បឹងកក់​ ​ឬ​អ្នក​ផ្សេងៗ​ទៀត​ឲ្យ​តែ​ហ៊ាន​តវ៉ា​គឺ​ការ​បំបាក់​​ស្មារតី​មិន​ឲ្យ​ហ៊ាន​ចេញ​មុខ​តែ​ម្តង​»​។

ចំណែក​មេធាវី​ការពារ​ក្តី​ឲ្យ​អ្នកស្រី គង់ ចន្ថា គឺ​អ្នកស្រី សាម សុគន្ធា មាន​ប្រសាសន៍​ថា​ការ​សម្រេច​ដាក់​ឲ្យ​កូន​ក្តី​អ្នកស្រី​នៅ​ក្រោម​ការ​ត្រួតពិនិត្យ​នេះ​ជា​ជម្រើស​របស់​ចៅក្រម​ក្នុង​ការ​បង្ក​ភាព​ងាយស្រួល​ក្នុង​ការ​ស៊ើបអង្កេត​។

ទោះ​យ៉ាង​ណា​ក៏ដោយ​អ្នកស្រី​ថ្លែង​ថា​តុលាការ​មិន​បាច់​ដាក់​លក្ខខណ្ឌ​បែប​នេះ​ក៏​មិន​ជា​អ្វី​ដែរ​ដោយ​ថា​​កូនក្តី​អ្នកស្រី​មិន​ដែល​រត់​ទៅ​ណា​ទេ​៕

អ្នកអាចស្វែងរកប្រភពដើមនៅទីនេះ

រូបភាពដោយ ភ្នំពេញប៉ុស្តិ៍