(Khmer) តុលាការ​កំពូលច្រានចោលបណ្ដឹងសុំនៅក្រៅឃុំរបស់​មន្ត្រី​ការ​ពារ​សិទ្ធិ​មនុស្ស​ដែល​កំពុង​ជាប់​ឃុំ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

បណ្ដឺងសុំនៅក្រៅឃុំរបស់មន្ត្រីសិទ្ធិមនុស្ស (អាដហុក) និងមន្ត្រី គ.ជ.ប ត្រូវបានតុលាការកំពូលបដិសេធ​ចោល​ កាលពីព្រឹកថ្ងៃទី ៣០ ខែវិច្ឆិកា ដែល​បាន​ជំនុំ​ជម្រះ​ដោយ​លោក​ចៅក្រម​ គីម​ សូថាវី​ កាល​ពី​សប្ដាហ៍​មុន​។

កាល​ពី​ថ្ងៃ​ទី២​ ខែ ​ឧសភា​ ​មន្ត្រី​សមាគម​អាដហុក ៤​រូប មាន លោក នី សុខា លោក យី សុសាន្ត លោក ណៃ វ៉ង់ដា និង​អ្នកស្រី លឹម មុន្នី ត្រូវ​តុលាការ​ក្រុង​ភ្នំពេញ ចោទ​ប្រកាន់​ពី​បទ​សូក​ប៉ាន់​សាក្សី ចំណែក​លោក នី ចរិយា ជាប់​ចោទ​ពី​បទ​សមគំនិត​សូក​ប៉ាន់​សាក្សី ទាក់ទង​នឹង​រឿង​ស្រីមុំ មក​សុំ​ជំនួយ​ផ្នែក​ច្បាប់​ពី​សមាគម​អាដហុក ដោយសារ​តែ​នាង​ត្រូវ​គេ​ទម្លាយ​រឿង​អាស្រូវ​ស្នេហា​ជាមួយ​ប្រធាន​ស្ដីទី​បក្ស​ប្រឆាំង​លោក កឹម សុខា នៅ​ពេញ​បណ្ដាញ​សង្គម​ហ្វេសប៊ុក (Facebook) ខណៈ​មជ្ឈដ្ឋាន​ទូទៅ​យល់​ថា ជា​រឿង​នយោបាយ និងមាន​​ការ​រិះ​គន់​​ជា​សាធារណៈ​ពី​សំណាក់​មតិ​ជាតិ​ និង​អន្តរជាតិ។​ ប្រសិន​បើ​​អ្នក​ទាំង​នោះ​​ត្រូវ​បាន​ផ្តន្ទាទោស​ នោះ​អ្នក​ទាំងនោះ​​នឹង​ត្រូវ​ជាប់​ពន្ធនាគារ​ចន្លោះ​​ពី​ ៥ឆ្នាំ​ ទៅ​​ ១០ឆ្នាំ​។

សាល​ដីកាតុលាកាកំពូល​ បាន​សម្រេច​តម្កល់​ទៅ​តាម​សាល​ដីកា​របស់​សាលា​ឧទ្ធរណ៍​​ ដើម្បី​បដិសេធ​ចោល​នូវ​បណ្ដឹង​សុំ​នៅ​ក្រៅ​ឃុំ​របស់​អ្នក​ទាំង​ប្រាំ​ដែល​បាន​ប្ដឹង​ជំទាស់​ទៅ​នឹង​សាល​ក្រម​របស់​សាលា​ដំបូង​រាជ​ធានី​ភ្នំពេញ​ ​ដែល​បាន​សម្រេច​បន្ត​ឃុំ​ខ្លួន​បណ្ដោះ​អាសន្ន​លើ​អ្នក​ទាំង​នោះ​ចំនួន​៦ខែ​ថែម​ទៀត​ បន្ថែម​លើ​រយៈពេល​កំណត់​នៅ​ក្នុង​ច្បាប់​កម្ពុជា​។ រហូត​មក​ដល់​ពេល​នេះ​ អ្នក​ទាំង​៥​ ត្រូវ​បាន​ឃុំ​ខ្លួន​អស់​រយៈ​ពេល​ជិត​៨ខែ​មក​ហើយ។

តុលាការ​សំអាង​ថា ការ​មិន​អនុញ្ញាត​មន្ត្រី​សិទ្ធិមនុស្ស ៤​រូប និង​មន្ត្រី គ.ជ.ប ១​រូប ឲ្យ​នៅ​ក្រៅ​ឃុំ​ដើម្បី​ជៀសវាង​កុំ​ឲ្យ​មាន​ការ​ត្រូវរ៉ូវ​គ្នា​រវាង​សាក្សី និង​ជន​ជាប់​ចោទ ទុក​ពេល​ឲ្យ​ចៅក្រម​សាលាដំបូង​បន្ត​សួរ​សាក្សី និង​រក​ភស្តុតាង​បន្ថែម​ទៀត ហើយ​ដើម្បី​រក្សា​សន្តិសុខ​ក្នុង​សង្គម​កុំ​ឲ្យ​មាន​ភាព​វឹកវរ។