ប្រភព៖ rfa.org
តំណាងពិសេសរបស់ក្រសួងការបរទេសសហរដ្ឋអាមេរិក ទទួលបន្ទុកផ្នែកកិច្ចការពលកម្មអន្តរជាតិ អ្នកស្រី សារ៉ា ហ្វក (Sarah Fox) នៅថ្ងៃអង្គារ ទី៤ តុលា ជួបសំណេះសំណាលជាមួយអ្នកសារព័ត៌មានក្នុងស្រុក ១០នាក់នៅស្ថានទូតអាមេរិក ទីក្រុងភ្នំពេញ ជុំវិញរឿងច្បាប់ការងារនៅកម្ពុជា។
ជំនួបពិភាក្សាជាមួយអ្នកសារព័ត៌មានក្នុងស្រុកនេះ ផ្តល់ឱកាសឲ្យអ្នកស្រី សារ៉ា ហ្វក បានចែករំលែកមតិរបស់អ្នកស្រី ក្រោយពីការធ្វើទស្សនកិច្ចទៅប្រទេសមីយ៉ាន់ម៉ា និងកម្ពុជា ដើម្បីផ្សព្វផ្សាយ និងជំរុញលក្ខខណ្ឌការងារតាមស្តង់ដាររបស់អង្គការអន្តរជាតិខាងការងារ អាយឡូ (ILO)។
អ្នកឯកទេសផ្នែកច្បាប់ការងាររបស់សហរដ្ឋអាមេរិករូបនេះ បានជួបជាមួយថ្នាក់ដឹកនាំជាន់ខ្ពស់រដ្ឋាភិបាលកម្ពុជា តំណាងសង្គមស៊ីវិល និងវិស័យឯកជន ដើម្បីលើកកម្ពស់ការអនុវត្តអនុសញ្ញាពីរនៃច្បាប់ការងារអន្តរជាតិ ដែលអ្នកស្រី សារ៉ា ហ្វក ថាមានសារសំខាន់ពិសេស។ ទីមួយ គឺអនុសញ្ញាលេខ៨៧ ស្ដីពីសិទ្ធិសេរីភាពក្នុងការចងក្រងជាក្រុម ឬជាសមាគម និងទីពីរ គឺអនុសញ្ញាលេខ៩៨ ស្ដីពីសិទ្ធិសេរីភាពក្នុងការចរចាអនុសញ្ញារួម ឬការចរចាជាសមូហភាព។
អ្នកស្រី សារ៉ា ហ្វក ហៅសិទ្ធិសេរីភាពទាំងពីរនេះថាជាសិទ្ធិមូលដ្ឋាន ដែលអនុញ្ញាតឲ្យភាគីពលករអាចទៅអនុវត្តសិទ្ធិសេរីភាពផ្សេងៗទៀតបាន ព្រោះសិទ្ធិទាំងពីរនេះផ្តល់ឱកាសឲ្យពលកររួបរួមគ្នាជាសំឡេងមួយ ហើយយកសំឡេងនោះទៅប្រើជាកម្លាំងសម្រាប់សន្ទនា និងចរចាជាមួយនិយោជករបស់ពួកគេ ដើម្បីទាមទារឲ្យមានលក្ខខណ្ឌការងារមួយដែលល្អប្រសើរ។
បន្ថែមពីលើនេះ អ្នកស្រី សារ៉ា ហ្វក បានលើកឡើងពីភាពរហ័សរហួនរបស់កម្ពុជា ក្នុងការផ្តល់សច្ចាប័នទៅលើអនុសញ្ញាទាំងនេះ ប៉ុន្តែអ្នកស្រីសំណូមពរឲ្យរដ្ឋាភិបាល បន្តពង្រឹងកិច្ចសហការជាមួយអង្គការអន្តរជាតិខាងការងារ អាយឡូ (ILO) និងព្យាយាមរកដំណោះស្រាយឆ្លើយតបទៅនឹងការព្រួយបារម្ភនានា ដូចជាច្បាប់សហជីព ជាដើម ដែលមានចំណុចមួយចំនួនអាចធ្វើឲ្យរាំងស្ទះដល់ការអនុវត្តអនុសញ្ញានេះ៖ «មានបញ្ហានៅសេសសល់មួយចំនួនដូចជា ការមិនអនុញ្ញាតឲ្យអ្នកធ្វើការមួយចំនួនចងក្រងគ្នាជាសហជីព។ ឧទាហរណ៍ដូចជា មន្ត្រីសាធារណៈជាដើម។ មានការព្រួយបារម្ភថា ផ្នែកខ្លះនៃច្បាប់នេះលូកដៃចូលកិច្ចការរបស់សហជីពច្រើនពេក។ តាមស្តង់ដារការងារអន្តរជាតិ វាជារឿងសំខាន់ដែលសហជីពត្រូវបានអនុញ្ញាតឲ្យគ្រប់គ្រងកិច្ចការដោយខ្លួនឯង។ ផ្នែកខ្លះនៃច្បាប់ និយាយពីលក្ខខណ្ឌដែលសហជីពអាចប្រមូលផ្តុំបាន ឬធ្វើកូដកម្មបាន សុទ្ធតែធ្វើឲ្យមានការព្រួយបារម្ភ បើមើលពីស្តង់ដារអន្តរជាតិ»។
ប្រធានសហព័ន្ធសហជីពឯករាជ្យកម្ពុជា អ្នកស្រី ទេព គឹមវណ្ណារី មានប្រសាសន៍ថា តាមការអង្កេតមើលរបស់អ្នកស្រីកន្លងទៅ ការអនុវត្តនូវអនុសញ្ញាទាំងពីរនេះមានការរីកចម្រើន ប៉ុន្តែនៅជួបបញ្ហាប្រឈមមួយចំនួន។
ចំពោះសិទ្ធិសេរីភាពក្នុងការចងក្រងជាសមាគម អ្នកស្រី ទេព គឹមវណ្ណារី ថាបច្ចុប្បន្ននេះ ការបង្កើតសហជីពមានភាពងាយស្រួលជាងមុន ព្រោះមិនចាំបាច់មានសមាសភាព ២០ភាគរយនៃបុគ្គលិកសរុបដើម្បីបង្កើតទេ។ ទោះបីជាយ៉ាងនេះក្តី អ្នកស្រីបន្តថា ការចងក្រងនូវសហជីព ជារឿយៗនៅតែបន្តជួបការមិនពេញចិត្តពីសំណាក់និយោជក៖ «កន្លងមក ពេលយើងចងក្រងសហជីពយើងហើយ យើងត្រូវយកសមាសភាពទៅឲ្យនិយោជកទទួលស្គាល់ មានប្រធានឈ្មោះនេះ ឈ្មោះនេះអ៊ីចឹង។ ពេលដែលគេឃើញសមាសភាពនោះ គេតែងមានការរើសអើង ដូចជាការបញ្ឈប់ប្រធានទាំងនោះ។ គេមិនចង់ឲ្យមានសហជីពនៅក្នុងក្រុមហ៊ុនគេទេ»។
ចំពោះសិទ្ធិសេរីភាពក្នុងការចរចាជាសមូហភាព អ្នកស្រី ទេព គឹមវណ្ណារី បន្តថា បច្ចុប្បន្នមាននិយោជកចាប់ផ្តើមឲ្យតម្លៃទៅលើការជជែកពិភាក្សាជាមួយសហជីព ដែលជាការល្អមួយ។ អ្នកស្រីថាបានជួយបញ្ចៀសជម្លោះរវាងពលករ និងក្រុមហ៊ុនច្រើន ប៉ុន្តែនៅតែមាននិយោជកមួយចំនួននៅតែមិនគោរពសិទ្ធិមួយនេះ ទោះបីជាបានចែងក្នុងអនុសញ្ញាអន្តរជាតិក៏ដោយ៕
