ប្រជាសហគមន៍បឹងកក់ បានបន្តប្រារព្ធយុទ្ធនាការថ្ងៃច័ន្ទពណ៏ខ្មៅសប្តាហ៍ទី ៣៦ ដើម្បីទាមទារសុំអោយមានការដោះលែង និងរកយុត្តិធម៌ ដល់អ្នកស្រី ទេព វន្នី មន្រ្តីសង្គមសុីវិលទាំង៤រូប មន្រ្តី គជប ១រូប អ្នកទោសនយោបាយផ្សេងទៀត ព្រមទាំងទាមទារឲ្យរកយុត្តិធម៌ ជូនលោកបណ្ឌិត កែម ឡី នៅព្រឹកថ្ងៃទី០៩ ខែមករានេះ។
ការបន្តរធ្វើយុទ្ធនាការថ្ងៃច័ន្ទពណ៏ខ្មៅនេះ ព្រោះប្រជាសហគមន៍មិនឃើញមានការដោះលែងមន្ត្រីការពារសិទ្ធិមនុស្សនិងមន្ត្រី គ.ជ.ប តាមការសន្យារបស់រដ្ឋាភិបាលកាលពីចុងឆ្នាំ២០១៦កន្លងទៅ។
អ្នកស្រី បូវ សោភាបាននិយាយថា៖ «ថ្ងៃនេះគឺយើងចាប់ផ្ដើមធ្វើយុទ្ធនាការឡើងវិញ ដោយភ្ជាប់ទៅនឹងការសន្យា របស់លោកឧបនាយក ស ខេង ដែលគាត់បានសន្យាថា នៅក្នុង ចុងឆ្នាំ២០១៦ និងមានយុត្តិធម៌ សេរីភាព សំារាប់សង្គមស៊ីវិល តែដោយឡែកកិច្ចសន្យារបស់លោកមិនទាន់បានធ្វើទេ តែពួកយើងមិនអស់សង្ឃឹមទេ ពួកយើងនឹងរកកិច្ចអន្តរាគមន៍ ពីលោកឧបនាយក ស ខេង បន្តទៀត»។
តំណាងសហគមន៍បានអះអាងថា៖ ពួកគេនឹងទៅដាក់ញត្តិទាមទារទៅរដ្ឋសភានិងក្រសួងមហាផ្ទៃនៅសប្តាហ៍នេះ។
អ្នកស្រី បូវ សោភា បន្តរថា៖ «ហើយស្អែកនេះដែរ សហគមន៍បឹងកក់ នឹងធ្វើញត្តិ ដើម្បីដាក់ទៅ លោកឧបនាយករដ្ឋមន្ត្រី ស ខេង ក៏ដូចជារដ្ឋសភា ពញ្ញាចក្រី ហេង សំរិន ដើម្បីផ្ដល់នូវយុត្តិធម៌សំរាប់អ្នកស្រី ទេព វន្នី»។
កញ្ញា សុង ស្រីលាភ សកម្មជនបឹងកក់ប្រាប់អ្នកសារព័ត៌មានថា បើរដ្ឋាភិបាលមិនដោះលែងមន្ត្រីសិទ្ធិមនុស្ស៤រូប មន្ត្រី គ.ជ.ប លោក នី ចរិយា និងអ្នកស្រី ទេព វន្នី ទេ ពួកគាត់នៅតែធ្វើយុទ្ធនាការនេះបន្តទៀត ហើយថាអាចធ្វើជាទ្រង់ទ្រាយធំទៀតផង។
លោកបណ្ឌិត កែម ឡី ត្រូវឃាតកបាញ់សម្លាប់កាលពីព្រឹកថ្ងៃទី១០ ខែកក្កដា ឆ្នាំ២០១៦ នៅក្នុងហាងលក់ទំនិញនៅស្ថានីយចាក់សាំងកាល់តិច (Caltex) ស្តុបបូកគោ។
មន្ត្រីការពារសិទ្ធិមនុស្សអាដហុក ៤រូប គឺមានលោក យី សុខសាន្ត លោក នី សុខា លោក ណៃ វ៉ង់ដា និងអ្នកស្រី លឹម មុន្នី និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក នី ចរិយា ត្រូវបានសាលាដំបូងរាជធានីភ្នំពេញ ចោទប្រកាន់ពីបទសូកប៉ាន់សាក្សី និងផ្សំគំនិតសូកប៉ាន់សាក្សីនៅក្នុងរឿងក្ដីស្នេហា លោក កឹម សុខា នឹង ស្រី មុំ កាលពីដើមខែឧសភា ឆ្នាំ២០១៦។