ប្រជាពលរដ្ឋចំនួនប្រមាណ១០នាក់ តំណាងអោយ១៧ គ្រូសារ ដែលរស់នៅភូមិព្រែកតាសេក ខណ្ឌជ្រោយចង្វារ បានដាក់ញាត្តិសុំអន្តរាគមន៍ ដល់ស្ថានទូតអាល្លឺម៉ង់ សហកភាពអឺរ៉ុប និងនៅក្រសួងរៀបចំដែនដី នគររូបនីយកម្ម និងសំណង់ នាព្រឹកនេះថ្ងៃទី៣១ សីហា។ ដើម្បីជួយជំរុញដល់រាជរាដ្ឋាភិបាល ក៏ដូចជាអាជ្ញាធរពាក់ព័ន្ធ រួមទាំងក្រុមហ៊ុន OCIC បញ្ឍប់ការរំលោបបំពាន នឹងផ្ដល់បណ្ណកម្មសិទ្ធិដល់ពួកគាត់។
តំណាងទូតអាល្លឺម៉ង់ និងសហភាពអឺរ៉ុប បានចេញមកទទួលញាត្តិហើយសន្យាថាជួយតាមដាន។ ចំណែកតំណាងក្រសួងរៀបចំដែនដីនិងនគររូបនីយកម្ម បានទទួលញាត្តិ តែថាមិនមែនជាដែនសមត្ថកិច្ចរបស់ខ្លួន ទុកអោយសាលារាជធានីភ្នំពេញជាអ្នកដោះស្រាយ ។
តំណាងប្រជាពលរដ្ឋ លោក ប៉ូល អម្រិតទិត្យា មានការខកចិត្តពេលដែលក្រសួងមិនព្រមដោះស្រាយ ហើយរុញអោយទៅសាលារាជធានី។
«យើងសឹងមិនអាចទទួលយកបានករណីដីធីយើងនឹងត្រូវបានបញ្ចូនត្រឡបទៅអោយសាសារាជធានី ព្រោះសាសារាជធានី អត់មានផ្ដល់ដំណោះស្រាយសមរមណាមួយទេ សំរាប់ប្រជាពលរដ្ឋ»។
រាជរដ្ឋាភិបាលបានផ្ដល់សិទ្ធិអោយក្រុមហ៊ុន OCIC ក្នុងការអភិវឌ្ឍន៍នៅឆ្នាំ២០១០។ ហើយនៅឆ្នាំ២០១១ក្រុមហ៊ុនបានធ្វើការឈូសឆាយ ដោយគ្មានការជូនដំណឹង និងផ្ដល់ដំណោះស្រាយសមរម្យជាមុនឡើយ ។
ផ្ទៃដីដែលប៉ះពាលមានទំហំសរុបចំនួន ៣៨ ៤៧០ ម៉ែត្រក្រឡា ដីសំរាប់លំនៅស្ថានមានចំនួន ៥ ១៧៤ ម៉ែត្រក្រឡា ។