របាយការណ៍ថ្មីមួយដែលមានចំណងជើងថា”ជំងឺកូវីដ-១៩ និងការផ្តល់ជំនួយ ” ដែលបានចេញផ្សាយដោយអង្គការសមាគមធាងត្នោត ដើម្បីធ្វើការសង្កេត ទៅលើការឆ្លើយតបរបស់រាជរដ្ឋាភិបាលក្នុងអំឡុងពេលមានការរីករាលដាលនៃជំងឺកូវីដ-១៩ ចំពោះសំណើនានា របស់សហគមន៍។ សហគមន៍ចំនួន៤៥ បានដាក់សំណើសុំកិច្ចអន្តរាគមន៍ចំនួន ៥ ចំណុចជូនទៅកាន់រាជរដ្ឋាភិបាលកាលពីឆ្នាំ ២០២០ ដើម្បីជួយពួកគេក្នុងអំឡុងនៃរីករាលដាលនៃជំងឺកូវីដ-១៩ ។ សំណើទាំងនោះមានដូចជា ការផ្តល់សម្ភារៈបរិក្ខាពេទ្យដល់សហគមន៍ដែលងាយរងគ្រោះ ការបន្ធូរបន្ថយឬពន្យាការសងបំណុលគ្រឹះស្ថានមីក្រូហិរញ្ញវត្ថុ ការសម្រួលឱ្យមានការជួលបន្ត និងការព្យួររាល់ពន្ធលើការលក់ដូរ ផ្តល់ប្រាក់ឧបត្ថម្ភដល់ប្រជាពលរដ្ឋដែលនៅផ្ទះដោយសារកូវីដ-១៩ និងបញ្ឈប់ការបណ្តេញចេញក្នុងអំឡុងពេលកូវីដ-១៩។
របាយការណ៍បានរកឃើញថា រាជរដ្ឋាភិបាលបានឆ្លើយតបទាន់ពេលវេលាលើចំណុចខ្លះ និងមិនទាន់បានល្អទៅលើចំនុចមួយចំនួនផ្សេងទៀត។ រាជរដ្ឋាភិបាលបានផ្តល់សម្ភារៈបរិក្ខារពេទ្យដល់សហគមន៍ ផ្តល់ប្រាក់ឧបត្ថម្ភប្រចាំខែ និងបង្កើតគោលនយោបាយដើម្បីកាត់បន្ថយបំណុលគ្រឹះស្ថានមីក្រូហិរញ្ញវត្ថុផងដែរ។ ទោះជាយ៉ាងនេះក្តី សហគមន៍បានលើកឡើងថា រាជរដ្ឋាភិបាលមិនបានឆ្លើយតបទៅនឹងសំណើរបស់ពួកគេ ដែលសុំ បញ្ឈប់ការបណ្តេញសហគមន៍ចេញពីលំនៅឋាននោះទេ ទោះបីជាក្នុងអំឡុងពេលរីករាលដាលជាសកលនៃជំងឺកូវីដ-១៩ ក៏ដោយ។ សហគមន៍ចំនួន ១១ ក្នុងរាជធានីភ្នំពេញ ត្រូវបានបណ្តេញចេញ ឬត្រូវបានជូនដំណឹងឱ្យរុះរើចេញក្នុងអំឡុងពេលរីករាលដាលនៃជំងឺកូវីដ-១៩។ រាជរដ្ឋាភិបាលមិនបានសម្រេចផ្អាកការបង់ថ្លៃជួលផ្ទះនោះទេ ទោះបីជាមានការស្នើសុំពីសហគមន៍ចំនួន ៣៧ ក្នុងចំណោមសហគមន៍ទាំង ៤៥ ដែល បានផ្តល់បទសម្ភាសក្នុងការស្រាវជ្រានេះ ក៏ដោយ។ ការស្នើសុំនេះ ត្រូវបានលើកឡើងក៏ព្រោះតែចំណូលរបស់កម្មករក្នុងសហគមន៍ទាំងនេះបានធ្លាក់ចុះ ឬពួកគេបានបាត់បង់ការងារ។ គ្រួសារប្រជាពលរដ្ឋជាច្រើនដែលជួលផ្ទះ ឬទីកន្លែងសម្រាប់លក់ដូរ ឬធ្វើអាជីវកម្ម រកចំណូលបានតិចមិនគ្រប់គ្រាន់សម្រាប់បង់ថ្លៃជួលផ្ទះ ឬទីកន្លែងអាជីវកម្មរបស់ពួកគេនោះទេ។
អ្នកស្រី ឡាយ ស្រីម៉េត តំណាងសហគមន៍ព្រែកតាគង់៦០ម៉ែត្រ បានលើកឡើងថា៖
“អំឡុងពេលររីករាលដាលនៃជំងឺកូវីដ-១៩ ប្រាក់ចំណូលរបស់ខ្ញុំបានធ្លាក់ចុះព្រោះការលក់ដូរមិនអាចរកបានដូចមុន។ ដោយសារមានការលំបាកខ្លាំងក្នុងជីវភាពប្រចាំថ្ងៃ។ ខ្ញុំ និងសមាជិកសហគមន៍ទាំងអស់ បានដាក់សំណើទៅកាន់រាជរដ្ឋាភិបាល ប៉ុន្តែពួកយើងនៅពុំទទួលបានជំនួយឬការឆ្លើយតបអ្វីទាំងអស់ពីរាជរដ្ឋាភិបាល” ។
ដើម្បីឈ្វេងយល់លម្អិតពីរបាយការណ៍សិក្សាស្រាវជ្រាវនេះសូមចូលទៅកាន់គេហទំព័រ: https://teangtnaut.org/?lang=km
លោកអ្នកអាចទាញយករបាយការណ៍នៅទីនេះ! ភាសាខ្មែរ – អង់គ្លេស
សម្រាប់ព័ត៌មានបន្ថែម សូមទំនាក់ទំនង៖
លោក សឿង សារ៉ន នាយកប្រតិបត្តិនៃអង្គការសមាគមធាងត្នោត។
ទូរស័ព្ទ៖ ០៨៩ ៦៦៦ ០១៣
អ៊ីមែល: director@teangtnaut.org
អ្នកស្រី ប្រាក់ សុធារី ទីប្រឹក្សាតស៊ូមតិ និងស្រាវជ្រាវនៃអង្គការសមាគមធាងត្នោត។
ទូរស័ព្ទ៖ ០១២ ៤៦៤ ៥០០
អ៊ីមែល: advisor1@teangtnaut.org
