អ្នកជំនាញឧស្សាហកម្មក្នុងស្រុកកាលពីម្សិលមិញបានឆ្លើយតបទៅនឹងរបាយការណ៍ថ្មីមួយដែលព្រមានថាភាគច្រើននៃកម្មករក្នុងវិស័យវាយនភ័ណ្ឌរបស់កម្ពុជាអាចបាត់បង់កាងាររបស់ពួកគេក្នុងរយៈពេល ២ ទសវត្សរ៍ខាងមុខដោយសារស្វ័យប្រវត្តិកម្ម និងបច្ចេកវិទ្យាតក្កកម្មនឹងជំនួសកម្លាំងពលកម្មដែលមានជំនាញទាប។
ការសិក្សាមួយរបស់អង្គការពលកម្មអន្តរជាតិ (ILO) ដែលចេញផ្សាយកាលពីថ្ងៃព្រហស្បតិ៍បានរកឃើញថា ៨៨ ភាគរយនៃប្រាក់បៀវត្សរ៍របស់កម្មករក្នុងវិស័យវាយនភ័ណ្ឌ សម្លៀកបំពាក់ និងស្បែកជើង (TCF) របស់កម្ពុជាស្ថិតក្នុងហានិភ័យនៃស្វ័យប្រវត្តិកម្ម។
របាយការណ៍នេះបានលើកឡើងពីបច្ចេកវិទ្យាមួយចំនួនដែលនឹងរារាំងដល់វិស័យនេះរួមមានបច្ចេកវិទ្យាបោះពុម្ព 3D បច្ចេកវិទ្យាស្កេនខ្លួន ការរចនាតាមកុំព្យូទ័រ (CAD) បច្ចេកវិទ្យាពាក់នឹងខ្លួនបាន និងម៉ាស៊ីនយន្តជាដើម។
របាយការណ៍របស់ ILO ឲ្យដឹងថា៖ «សម្រាប់ប្រទេសមួយចំនួនដូចជាកម្ពុជាជាទីដែលផលិតកម្ម TCF គ្របដណ្ដប់លើវិស័យកម្មន្តសាលដែលគ្មានពិពិធកម្ម និងបង្កើតការងារប្រហែល ៦០ ភាគរយនៃការងារកម្មន្តសាលនោះផលប៉ះពាល់នឹងមានខ្លាំងជាងប្រទេសផ្សេងទៀត»។
យោងតាមរបាយការណ៍ ILO ម៉ាស៊ីនកាត់ស្វ័យប្រវត្តិបច្ចុប្បន្នកំពុងក្លាយជាបច្ចេកវិទ្យាដែលអាចរកបានដ៏ទូលំទូលាយហើយម៉ាស៊ីនយន្តដែលមានសមត្ថភាពដេរ ឬហៅថា «មនុស្សយន្តដេរ» ក្នុងពេលឆាប់ៗនឹងផ្លាស់ប្តូរការគណនាផលិតកម្មវាយនភ័ណ្ឌ សម្លៀកបំពាក់ និងស្បែកជើង។ មនុស្សយន្តដេរមិនទំនងជាជំនួសកម្មករបច្ចុប្បន្ននៅក្នុងរោងចក្រកាត់ដេរតំបន់អាស៊ាននោះទេប៉ុន្តែទំនងជានឹងត្រូវបានដាក់ឲ្យប្រើប្រាស់នៅក្នុងទីផ្សារទិសដៅដូចជាប្រទេសចិន អឺរ៉ុប និងអាមេរិកជាដើម។
លោក កាំង ម៉ូនីកា អគ្គលេខាធិការងសមាគមរោងចក្រកាត់ដេរកម្ពុជា (GMAC) បានថ្លែងថាវាជានិន្នាការទូទៅដែលវិនិយោគិនបំពាក់ឧបករណ៍បច្ចេកវិទ្យាកាន់តែទំនើបក្នុងប្រតិបត្តិការពាណិជ្ជកម្មរបស់ពួកគេហើយវានឹងកាត់បន្ថយការពឹងផ្អែកលើការងាររបស់មនុស្ស។ ប៉ុន្តែលោកបានថ្លែងថាវិស័យកាត់ដេរកម្ពុជាគឺជាឧស្សាហកម្មប្រើប្រាស់កម្លាំងពលកម្មច្រើន។
លោកបានលើកឡើងថា៖ «ខ្ញុំគិតថាបច្ចេកវិទ្យាថ្មីនេះនឹងជួយជំនួសការងារមនុស្សក្នុងផ្នែកមួយចំនួនប៉ុន្តែមិនទាំងអស់នោះទេ។ វាមិនអាចលុបបំបាត់ការងាររបស់មនុស្សទាំងស្រុងនោះទេ»។ លោកបន្តថា៖ «មានផ្នែកជាច្រើននៅតែត្រូវការមនុស្សធ្វើ។ កម្មន្តសាលដូចជាការផលិតសម្លៀកបំពាក់ និងស្បែកជើងមិនអាចប្រើប្រាស់ម៉ាស៊ីនទាំងអស់ទេ»។
ម៉ូនីកា បានបញ្ជាក់ថាការផ្លាស់ប្តូរដ៏ធំរបស់កម្លាំងពលកម្មនៅក្នុងឧស្សាហកម្មកាត់ដេរពឹងលើបរិយាកាសវិនិយោគកម្ពុជាគោលនយោបាយរបស់រដ្ឋាភិបាល និងការប្រែប្រួលទីផ្សារអន្តរជាតិ។
លោកបញ្ជាក់ថា៖ «ខ្ញុំមិនគិតថាការវិវឌ្ឍបច្ចេកវិទ្យាគំរាមកំហែងដល់ការងាររបស់មនុស្សក្នុងឧស្សាហកម្មកាត់ដេរកម្ពុជានោះទេ»។ លោកបន្តថា៖ «ប្រសិនបើបរិយាកាសវិនិយោគរបស់យើងនៅតែល្អហើយយើងអាចចរចាកិច្ចព្រមព្រៀងពាណិជ្ជកម្មសេរីជាមួយនឹងប្រទេសធំៗបានឧស្សាហកម្មកាត់ដេរគឺនៅតែជាកន្លែងដែលផ្ដល់ការងារដដែល»។
លោក Kevin Tang ប្រធានគ្រប់គ្រងទូទៅនៅក្រុមហ៊ុន All Wintex Garment Manufacturing Corp បានថ្លែងថាវាជានិន្នាការដែលមិនអាចប្រកែកបានបើនៅពេលបច្ចេកវិទ្យាវិវឌ្ឍទៅមុខ ការងាររបស់មនុស្សនឹងកាន់តែតិចទៅៗ។
លោកមានប្រសាសន៍ថា៖ «បច្ចុប្បន្នយើងមិនមានផែនការ [ប្រើប្រាស់ម៉ាស៊ីនស្វ័យប្រវត្តិដើម្បីជំនួសការងារមនុស្សនោះទេ] ដោយសារនៅពេលនេះម៉ាស៊ីនមិនល្អគ្រប់គ្រាន់នោះទេ»។ លោកបន្ថែមថាជានិច្ចកាលម៉ាស៊ីនគឺល្អប្រើបើវាអាចជំនួសការងាររបស់មនុស្សបានទាំងអស់ដោយសារតែវាមិនធ្វើបាតុកម្ម។
លោកបន្ថែមថា៖ «នៅពេលនេះម៉ាស៊ីនមានតម្លៃខ្ពស់ណាស់ប៉ុន្តែប្រសិនបើប្រាក់ខែបន្តកើនឡើងវានឹងល្អក្នុងការប្រើប្រាស់ម៉ាស៊ីនជំនួសវិញ»។
លោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថាគុណសម្បត្តិរបស់បច្ចេកវិទ្យាកំពុងដើរទៅមុខដោយគ្មាននរណាម្នាក់អាចបញ្ឈប់វាបានហើយដូចគ្នានេះដែរកម្ពុជាពឹងផ្អែកលើឧស្សាហកម្មរោងចក្រដូច្នេះកម្ពុជាត្រូវតែលើកកម្ពស់ជំនាញដែលអាចមានភាពបត់បែនទៅនឹងតម្រូវការរបស់ឧស្សាហកម្ម និងទីផ្សារ។
លោកបានមានប្រសាសន៍ថា៖ «យើងមិនអាចចៀសផុតពីការវិវឌ្ឍខាងផ្នែកបច្ចេកវិទ្យាបានទេ។ យើងត្រូវតែត្រៀមខ្លួនជាស្រេចហើយចាំបាច់ត្រូវលើកកម្ពស់សមត្ថភាពជំនាញដែលអាចមានភាពបត់បែន និងកែតម្រូវបានតម្រូវការឧស្សាហកម្ម»។
លោកបន្ថែមថាកម្ពុជាមានកម្លាំងពលកម្មវ័យក្មេងជាច្រើនដែលអាចលើកកម្ពស់ជំនាញ និងការត្រិះរិះពិចារណា និងការដោះស្រាយបញ្ហារបស់ពួកគេ។
លោកបន្តថា៖ «កម្លាំងពលកម្មរបស់កម្ពុជានៅក្មេងខ្ចីនៅឡើយដែលត្រូវការពេលវេលាក្នុងការកែតម្រូវប្រព័ន្ធអប់រំ និងសមត្ថភាពជំនាញចាប់ពីពេលនេះតទៅ។
លោកបន្ថែមថាឧត្តមក្រុមប្រឹក្សាសេដ្ឋកិច្ចជាតិកំពុងរៀបចំ និងវិភាគអំពីកម្លាំងពលកម្មដើម្បីអភិវឌ្ឍសមត្ថភាពជំនាញដើម្បីឆ្លើយតបតាមតម្រូវការទីផ្សារ។
លោក គង់ អាទិត្យ អនុប្រធានសម្ព័ន្ធសហជីពស៊ីខៅឌូថ្លែងថាកម្មករនឹងបង្ខំចិត្តធ្វើចំណាកស្រុកទៅធ្វើការនៅប្រទេសផ្សេងទៀត ឬធ្វើការងារនៅទីកន្លែងមានហានិភ័យខ្ពស់ដើម្បីរស់បើម្ចាស់រោងចក្រប្រើម៉ាស៊ីនជំនួសកម្លាំងពលកម្មហើយរដ្ឋាភិបាលគួរត្រៀមខ្លួនឲ្យបានល្អមុនពេលបញ្ហាសង្គមផ្សេងៗកើតមានឡើង។
លោកថ្លែងថា៖ «រដ្ឋាភិបាលគួរតែចាត់វិធានការលើគោលនយោបាយសម្រាប់ការពង្រឹងជំនាញរបស់កម្មករ។ លើសពីនេះទៅទៀតរដ្ឋាភិបាលគួរយកចិត្តទុកដាក់ថាតើវិនិយោគិនជំរុញកម្លាំងពលកម្ម ឬម៉ាស៊ីនដើម្បីជំនួសកម្មករ»៕
ប្រភព៖ postkhmer.com
