គណៈកម្មាធិការជាតិរៀបចំការបោះឆ្នោត (គជប) ថាគណបក្សនយោបាយ និងអង្គការសង្គមស៊ីវិលអាចផ្សព្វផ្សាយដល់ពលរដ្ឋឲ្យពិនិត្យបញ្ជីបោះឆ្នោតដំបូងនៅតាមទីសាធារណៈបានតែត្រូវសុំការអនុញ្ញាតពីអាជ្ញាធរជាមុនខណៈដែលបញ្ជីបោះឆ្នោតដំបូងនេះនឹងត្រូវបិទផ្សាយនៅទីតាំងយ៉ាងតិចពីរផ្សេងគ្នានៅក្នុងឃុំសង្កាត់នីមួយៗ។
ក្នុងកិច្ចប្រជុំផ្សព្វផ្សាយពីការបិទបញ្ជីបោះឆ្នោតដំបូងនៅទីស្នាក់ការ គ.ជ.ប. កាលពីម្សិលមិញភាគីគ.ជ.ប. បានកំណត់យកថ្ងៃទី ៣ ដល់ថ្ងៃទី ១៤ ខែកមរា ឆ្នាំ ២០១៧ ជារយៈពេលដែលត្រូវបិទបញ្ជីបោះឆ្នោតដំបូង។
ក្នុងរយៈពេលនេះពលរដ្ឋអាចពិនិត្យឈ្មោះរបស់ខ្លួន និងថាបើមានរកឃើញថាខុសទិន្នន័យ ឬបាត់ឈ្មោះពលរដ្ឋអាចដាក់ពាក្យសុំកែសម្រួល ឬចុះឈ្មោះជាថ្មីបានក្នុងករណីមានបង្កាន់ដៃ។ ជាមួយគ្នានោះពលរដ្ឋក៏អាចប្តឹងជំទាស់នឹងឈ្មោះអ្នកផ្សេងដែលពួកគាត់សង្ស័យ ឬដឹងថាមិនមានលក្ខណសម្បត្តិគ្រប់គ្រាន់សម្រាប់បោះឆ្នោតផងដែរ។
ដើម្បីឲ្យព័ត៌មានទាំងនេះបានដឹងដល់ពលរដ្ឋនៅតាមមូលដ្ឋានអគ្គលេខាធិការ គ.ជ.ប. លោក ទេព នីថា ថ្លែងក្នុងកិច្ចប្រជុំថា គ.ជ.ប. បានសហការជាមួយអង្គការជាដៃគូ ផ្សព្វផ្សាយព័ត៌មាននេះតាំងពីខែមុនម៉េះ។
លោកបន្តថា មធ្យោបាយផ្សព្វផ្សាយកន្លងមកមានដូចជាតាមទូរទស្សន៍ និងវិទ្យុ និងថាមានអង្គការដៃគូមួយចំនួនក៏បានចូលរួមជួយផ្សព្វផ្សាយផងដែរ។
មួយវិញទៀត លោកថានៅថ្ងៃបិទបញ្ជីបោះឆ្នោតដំបូង គ.ជ.ប. នឹងមានភ្នាក់ងារផ្សព្វផ្សាយតាមឧបករណ៍បំពងសំឡេងចល័តពេញមួយថ្ងៃនៅក្នុងឃុំសង្កាត់នីមួយៗ។ ត្រង់ចំណុចនេះដែរគណបក្សនយោបាយ ឬអង្គការសង្គមស៊ីវិលផ្សេងទៀតដែលចង់ផ្សព្វផ្សាយបន្ថែមក៏អាចធ្វើបានដូចគ្នាតែត្រូវសុំការអនុញ្ញាតពីអាជ្ញាធរជាមុនសិន។
លោក ទេព នីថា ឲ្យដឹងថាបញ្ជីឈ្មោះបោះឆ្នោតដំបូងនេះនឹងត្រូវបិទផ្សាយពីរកន្លែងផ្សេងគ្នាក្នុងឃុំសង្កាត់នីមួយៗតាមសាលាឃុំ ឬសង្កាត់ និងទីពីរអាចថានៅតាមទីប្រជុំជនណាមួយក្នុងឃុំសង្កាត់នោះ។
ទោះយ៉ាងណា លោកថា គណបក្សនយោបាយក៏អាចទិញបញ្ជីឈ្មោះនេះពី គ.ជ.ប. ដើម្បីយកទៅបិទផ្សាយនៅតាមស្នាក់ការបក្សរបស់ខ្លួនបានដែរដោយឯកសារនោះមានតម្លៃទៅតាមតម្លៃផលិតជាក់ស្តែង។
លោកបន្ថែមថា៖ «រួមមកវិញនេះជាការងារដែលយើងបានធ្វើជាយន្តការដែលយើងបានផ្សព្វផ្សាយ…ជាមួយគ្នានេះនៅទីនេះមានតំណាងអង្គការគណបក្សនយោបាយអ្នកយកព័ត៌មានក៏អំពាវនាវផងដែរសហការផ្សាយព័ត៌មាននេះដល់ពលរដ្ឋ…ទាក់ទងនឹងការផ្សព្វផ្សាយរបស់គណបក្សនយោបាយ..ជាសាធារណៈណាមួយនោះត្រូវសុំទៅអាជ្ញាធរ»។
ប្រធាននាយកដ្ឋានកិច្ចការបោះឆ្នោត និងនីតិកម្មរបស់គណបក្សសង្គ្រោះជាតិអ្នកស្រី ម៉េង សុភារី ដែលបានចូលរួមកិច្ចប្រជុំនេះបានប្រាប់អ្នកសារព័ត៌មានថាគណបក្សនឹងដាក់ពាក្យទិញបញ្ជីឈ្មោះបោះឆ្នោតពីគណៈកម្មាធិការជាតិរៀបចំការបោះឆ្នោតតាមនីតិវិធីរបស់ គ.ជ.ប. ដើម្បីបិទផ្សាយនៅតាមស្នាក់ការរបស់ខ្លួន។
ទោះយ៉ាងណា លោកស្រីថា តម្លៃរបស់ឯកសារទាំងនេះមិនទាន់ដឹងនៅឡើយទេ។ ជាមួយគ្នានេះអ្នកស្រីឲ្យដឹងដែរថាគណបក្សនឹងចូលរួមផ្សព្វផ្សាយពីការបិទបញ្ជីឈ្មោះបោះឆ្នោតនេះផងដែរ។
អ្នកស្រីឲ្យដឹងដែរថាគណបក្សក៏ត្រៀមដាក់ពាក្យប្តឹងជំទាស់លើអ្នកចុះឈ្មោះប្រហែលជាប្រាំពាន់នាក់លើលក្ខខណ្ឌសញ្ជាតិដោយថាអ្នកទាំងនោះជាជនជាតិវៀតណាមមានអត្តសញ្ញាណប័ណ្ណសញ្ជាតិខ្មែរ និងថាភាគច្រើននៅភ្នំពេញ និងខេត្តស្វាយរៀង។
លោកស្រីបន្ថែមថា៖ «យើងឃើញថាជនទាំងនោះមានអត្តសញ្ញាណប័ណ្ណសញ្ញាតិខ្មែរប៉ុន្តែថាតើអត្តសញ្ញាណប័ណ្ណនោះត្រឹមត្រូវតាមសញ្ជាតូបនីយកម្មដោយមានព្រះរាជក្រឹត្យដែរឬយ៉ាងណា?
ភ្នាក់ងារគណបក្សតាមមូលដ្ឋានអាចដឹងពីរឿងនេះច្រើន»។
ជាបណ្តោះអាសន្នបញ្ជីឈ្មោះបោះឆ្នោតដែលនឹងត្រូវបិទផ្សាយនោះមានអ្នកចុះឈ្មោះសរុបចំនួន ៧ ៨៧៥ ៥១២ នាក់។
ដោយឡែកសុពលភាព និងបញ្ជីឈ្មោះបោះឆ្នោតផ្លូវការនឹងប្រកាសផ្សាយនៅថ្ងៃទី ១២ ខែកុម្ភៈ ឆ្នាំ ២០១៧ បន្ទាប់ពីដោះស្រាយបណ្តឹងទាស់រួចរាល់។ ក្រោយការប្រកាសបញ្ជីផ្លូវការនេះនឹងមិនអនុញ្ញាតឲ្យប្តឹងតវ៉ាចំពោះបញ្ជីឈ្មោះនេះទៀតទេ៕
ប្រភព៖ postkhmer
