ពលរដ្ឋប្រមាណ២០០នាក់ ដែលមកពីសហគមន៍រងគ្រោះដីធ្លីក្នុងរាជធានីភ្នំពេញគ្រោងប្រារព្ធទិវាសិទ្ធិលំនៅឋានពិភពលោកនៅសហគមន៍ជ្រោយចង្វា ប៉ុន្តែមិនអាចប្រារព្ធបានក្រោយអាជ្ញាធររាជធានីភ្នំពេញមិនអនុញ្ញាត។
សាលារាជធានីភ្នំពេញ បានចេញលិខិតហាមឃាត់មិនឲ្យពលរដ្ឋប្រារព្ធទិវាសិទ្ធិលំនៅឋានពិភពលោកដោយលើកហេតុផលថាប៉ះពាល់ដល់សន្តិសុខ សណ្តាប់ធ្នាប់សាធារណៈ និងបរិបទនយោបាយស្ថិតក្នុងភាពតានតឹង។ ក្នុងលិខិតបន្តថា អ្នកដឹកនាំនឹងទទួលខុសត្រូវចំពោះមុខច្បាប់។
ក្នុងនោះផងដែរក៏មានសហគមន៍ដីធ្លីផ្សេងទៀតដូចជា អតីតបឹងកក់ សហគមន៍បុរីកីឡា និង សហគមន៍ព្រលានយន្តហោះអេសអូអេស ដែលគ្រោងនឹងធ្វើនៅថ្ងៃច័ន្ទទី១៦ ខែតុលា ឆ្នាំ២០១៧ ក៏ត្រូវបានខកខាន ដោយសារគ្មានការអនុញ្ញាតពីសាលារាជធានី។
អ្នកស្រី ស៊ា ណារ៉េត បានផ្ដល់បទសំភាសដល់វិទ្យុអាស៊ីសេរីថា «ដោយសារតែអ្នកស្រី និងពលរដ្ឋបឹងកក់ ជាង៣ពាន់គ្រួសារ បានរងគ្រោះធ្លាក់ខ្លួនក្រ ដោយសារតែគម្រោងអភិវឌ្ឍន៍បឹងកក់របស់រដ្ឋាភិបាល មិនបានផ្ដល់សំណងសមរម្យឲ្យពលរដ្ឋជាម្ចាស់ផ្ទះ ម្ចាស់ដី។ អ្នកស្រី បន្ថែមថា រដ្ឋាភិបាលលោក ហ៊ុន សែន បានបង្ហាញឲ្យគ្រប់គ្នាឃើញថា រដ្ឋាភិបាលកម្ពុជាជា រដ្ឋាភិបាលផ្ដាច់ការ មិនគោរពសិទ្ធិពលរដ្ឋជាដើម»។
សហគមន៍ឡពាងប្រារព្ធទិវាសិទ្ធិលំនៅឋានពិភពលោកលើកទី៣២ មានអ្នកចូលរួមប្រមាណ២០០នាក់ ក្រោមប្រធានបទ ផ្ទះខ្ញុំ ដីខ្ញុំ គ្មានដីគ្មានជីវិត ធ្វើនៅក្នុងសហគមន៍របស់ខ្លួន ក្រោមការឃ្លាំមើលពីសំណាក់ អាជ្ញាធរមូលដ្ឋាន កាលពីថ្ងៃទី០៨ ខែតុលាឆ្នាំ២០១៧។
នៅល្ងាចថ្ងៃទី០៩ ខែតុលា ឆ្នាំ២០១៧ សហគមន៍ដីធ្លី បុរីកីឡា និង ភ្នំបាត បានប្រារព្ធកម្មវិធីទិវាសិទ្ធិលំនៅដ្ឋានពិភពលោកលើកទី៣២ នៅក្នុងសហគមន៍របស់ពួកគេ ក្រោមការឃ្លាំមើលពី សំណាក់អាជ្ញាធរ និងសន្តិសុខខណ្ឌ៧មករា។ សន្តិសុខខណ្ឌ៧មករាបានដណ្ដើមយកផ្ទះសិប្បនិមិត្តរបស់សហគមន៍ផងដែរ៕
