នៅក្នុងឳកាសទិវាសិទ្ធិមនុស្សអន្តរជាតិឆ្នាំ២០១៧នេះ យើងខ្ញុំជាអង្គការសង្គមស៊ីវិលដែលមានរាយនាមដូចខាងក្រោម សូមសំណូមពរដោយទទូចឱ្យ អជ្ញាធរកម្ពុជាបញ្ឈប់ការធ្វើទុក្ខបុកម្នេញមកលើអ្នកការពារសីទ្ធិមនុស្ស និងក្រុមអង្គការសង្គមស៊ីវិល ក៏ដូចជាបញ្ឃប់ការរឹតបន្តឹងដោយមិនសមហេតុផលទៅលើសិទ្ធិសេរីភាពជាមូលដ្ឋាន។
ការគោរពសិទ្ធិសេរីភាពជាមូលដ្ឋាន គឺជាតម្រូវការចាំបាច់សម្រាប់ដំណើរការនៃសង្កមស៊ីវិល ដែលត្រូវបានធានាដោយរដ្ឋធម្មនុញនែព្រះរាជាណាចក្រកម្ពុជា និងច្បាប់អន្តរជាតិផងដែរ។
អស់រយៈពេលជាច្រើនឆ្នាំមកហើយ ដែលអង្គការសង្គមស៊ីវិលបានរួមចំណែក ដល់កិច្ចខិតខំប្រឹងប្រែងក្នុងការកសាងសន្តិភាព បន្ទាប់ពីសង្រ្គាមស៊ីវិលនៅកម្ពុជាត្រូវបានបញ្ចប់ និងបានរួមចំណែកក្នុងការអភិវឌ្ឍន៍ប្រទេស ក៏ដូចជាការលើកកម្ពស់សិទ្ធិមនុស្ស និងគោលការណ៍ប្រជាធិបតេយ្យជាដើម។ ការងារស្របច្បាប់របស់អង្គការសង្គមស៊ីវិល មិនគួរត្រូវបានចោទប្រកាន់ថាជាការគំរាមកំហែងដល់សន្តិសុខជាតិទេ ប៉ុន្តែគួរតែទទួលបានតម្លៃ និងការការពារ ព្រោះនេះជាមូលដ្ឋានគ្រឹះដ៏សំខាន់ ក្នុងការអភិវឌ្ឍន៍ប្រទេសប្រកបដោយចីរភាព។
ទោះបីជាយ៉ាងនេះក្ដី លំហសម្រាប់អង្គការសង្គមស៊ីវិល ក្នុងដំណើរការសកម្មភាពរបស់ខ្លួន ត្រូវបានរឹតត្បិតយ៉ាងខ្លាំងក្នុងរយៈពេលប៉ុន្មានខែចុងក្រោយនេះ៕
