English
ខ្មែរ
កម្មវិធីអ្នកដឹកនាំសហគមន៍វ័យក្មេង ក្រោមសកម្មភាព “ជំរំយុវជនដើម្បីសិទ្ធិលំនៅឋាន”
អង្គការសមាគមធាងត្នោត បានរៀបចំកម្មវិធី អ្នកដឹកនាំសហគមន៍វ័យក្មេង ក្រោមសកម្មភាព “ជំរំយុវជនដើម្បីសិទ្ធិលំនៅឋាន” ដែលប្រព្រឹត្តទៅចាប់ពីថ្ងៃទី១៤ ដល់ ១៨ ខែមិថុនា ឆ្នាំ២០២៤ នៅតំបន់សហគមន៍អារ៉ែង ខេត្តកោះកុង។ ការបោះជំរំនេះមានអ្នកចូលរួមសរុបចំនួន ៣៥ នាក់ (ស្រី១៧នាក់ រួមទាំងLGBTQ+) ដែលជាយុវជនមកពីសហគមន៍គោលដៅចំនួន៧ ក្នុងរាជធានីភ្នំពេញ, ជនជាតិដើមភាគតិចកួយ និងយុវជនមកពីសាកលវិទ្យាល័យនានា។
កម្មវិធីបោះជំរំនេះមានគោលបំណងផ្ដល់ឳកាសឱ្យយុវជន ដែលជាសិស្ស និស្សិត និងយុវជនសហគមន៍ ក្នុងការចូលរួមស្វែងយល់អំពីការសិក្សាស្រាវជ្រាវរបស់ការវិនិយោគរបស់ជនបរទេសនៅប្រទេសកម្ពុជា ព្រមទាំងផ្ដល់ចំណេះដឹងទាក់ទងនិងសិទ្ធមនុស្ស នឹងធុរៈកិច្ច និងសិទ្ធិមានលំនៅឋានសមរម្យ។
សកម្មភាពចម្បងៗក្នុងកម្មវិធីទាំងមូលមានដូចជា៖ ការចែករំលែកពីតំណាងសហគមន៍អារ៉ែង អំពីប្រវត្តិសហគមន៍ ការតស៊ូមតិ បញ្ហាប្រឈម និងសមិទ្ធផលសហគមន៍ ការចែករំលែកអំពីប្រធានបទសិទ្ធិមនុស្ស និងធុរៈកិច្ច និងសិទ្ធមានលំនៅឋានសមរម្យ បទបង្ហាញពីការសិក្សាស្រាវជ្រាវលើប្រធានបទការវិនិយោគរបស់ជនបរទេសមកលើប្រទេសកម្ពុជា ការបង្ហាញពីកម្មវិធីអ្នកដឹកនាំសហគមន៍វ័យក្មេងលើការកសាងភាពជាអ្នកដឹកនាំក្នុងការធ្វើយុទ្ធនាការក្នុងសហគមន៍ និងសកម្មភាពកសាងក្រុមជាច្រើនទៀត។
អ្នកចូលរួមម្នាក់បានលើកឡើងថា “បន្ទាប់ពីខ្ញុំបានចូលរួមការបោះជំរំ ខ្ញុំបានទទួលចំណេះដឹងអំពីគោលគំនិតនៃសិទ្ធិលំនៅឋាន និងការវិនិយោគផ្ទាល់ពីបរទេស រៀនពីរបៀបរស់នៅដូចប្រជាជនសហគមន៍ដោយគ្មានអ៊ីនធឺណិត និងញ៉ាំអាហារក្នុងស្រុក ព្រមទាំង រៀនពីការសម្ដែងល្ខោនជីវិត”
ខាងក្រោមនេះគឺជារូបភាពសកម្មភាពទាំងមូលនៃការបោះជំរំយុវជនរបស់យើង៖
