ចិញ្ចើមផ្លូវ និងទីកន្លែងសាធារណៈនៅរាជធានីភ្នំពេញ

របាយការណ៍ស្រាវជ្រាវចុងក្រោយរបស់អង្គការសមាគមធាងត្នោត ការពិត និងតួលេខទី៣៦ នេះគឺជាការគូរផែនទីផ្លូវ ចិញ្ចើមផ្លូវ និងទីកន្លែងសាធារណៈនៅរាជធានីភ្នំពេញ ដែលមិនទាន់មានការចូលរួមគ្រប់ជ្រុងជ្រោយក្នុងការអភិវឌ្ឍទីក្រុង។ ការស្រាវជ្រាវនេះប្រើប្រាស់ សូចនាករ១១.៧.១នៃគោលដៅអភិវឌ្ឍន៍ប្រកបដោយចិរភាព ដែលផ្ដោតទៅលើការការគិតគូរ គ្រប់ជ្រុងជ្រោយសម្រាប់រាជធានីភ្នំពេញ។

អ្នកស្រាវជ្រាវរបស់អង្គការសមាគមធាងត្នោតបានរកឃើញថា ផ្លូវ ចិញ្ចើមផ្លូវ និងទីកន្លែងសាធារណៈនៅក្នុងទីក្រុងបានគណនាឃើញថាមានចំនួន១៦.៣៦%នៃផ្ទៃដីសរុបទាំងអស់នៅក្នុងរាជធានីភ្នំពេញ។ ផ្លូវ និងចិញ្ចើមផ្លូវមានចំនួន១៤.២៦% ដែលមិនមែនជាចំនួនទាបទេ បើប្រៀបធៀបនឹងទីក្រុងបាងកក (១៥.៩%) និងទីក្រុងម៉ានីល (១៥.២%) ប៉ុន្ដែចំនួននេះទាបជាងទីក្រុង សិង្ហបុរី (២១.៦%)។ ២.១០%នៃទីកន្លែងសាធារណៈក្នុងរាជធានីភ្នំពេញ មានដូចជាសួនច្បារ ទីកន្លែងហាត់ប្រាណ និងទីកន្លែងសម្រាប់ឱ្យប្រជាពលរដ្ឋចូលរួមបានជាដើមនោះ គឺស្ថិតិនេះស្ថិតនៅក្រោមស្ដង់ដាអន្ដរជាតិ ១០% ហើយទីកន្លែងសាធារណៈភាគច្រើន គឺត្រូវបានរកឃើញថាស្ថិតនៅក្នុងខណ្ឌដូនពេញ និងខណ្ឌចំការមន៕

សំរាប់ព័ត៌មានបន្ថែមសូមទំនាក់ទំនង៖
លោក សឿង សារ៉ន នាយកប្រតិបត្តិនៃអង្គការសមាគមធាងត្នោត
អ៊ីមែល៖ [email protected]

លោក Isaac Daniels ទីប្រឹក្សាកម្មវិធីនៃអង្គការសមាគមធាងត្នោត
អ៊ីមែល៖ [email protected]